– Får me vera med deg på trening?

I løpet av vinteren startar Strilen opp med Aktiv, ein redaksjonell serie der me skal få inn tips om trim og trening, og gje desse vidare til lesarane. Me skal padla kajakk, jogga langsetter asfalten, gå på toppane og rusla på skogsstiar, alt for å gje deg gode treningstips og kanskje eit lite spark til å ta turen opp av sofaen.
Kanskje treng du ikkje ein gong gå ut? Tredemøller og spinningsyklar er vel snart like vanlege som roapparata og vektbenkane, og me kjenner oss sikre på at dei i nokre heimar tener som meir enn klesstativ og dørstopparar.

Gå løypa
Så har du ein turmål som er heilt spesielt, i alle fall for deg, så gje ein lyd på aktiv@strilen.no. Me vil gå løypa og skriva om turen, aller helst saman med deg. Ved å skriva om turen håpar me at andre vil prøva seg på nye stiar, så du kan risikera at den hemmelege perla må delast med andre.
Eller kanskje har du lyst til å visa kvifor squash er den mest intense treninga ein kan få, kvifor kajakkpadling gjev den beste kombinasjonen av trening og naturoppleving, eller kvifor veterantreninga på fotballen framleis er kjekk sjølv etter femogtjue år m ed lyskestrekk og stive leggar.

Nå ei mål
Aktiv skal handla om nettopp det, å vera aktiv. Dette skal vera turar og aktivitetar som dei fleste kan klara, og som alle kan ha som eit mål å gjennomføra. For mange vil det vera eit mål i seg sjølv, å rydda tid i kvardagen til ei treningsøkt eller to i veka. Andre har kanskje eit løp eller eit sykkelritt dei skal vera med på i løpet av 2011.
Me tre har også våre mål, Anne-Lise skal sykla Birken, medan Silje og Ketil skal springa halvmaraton.
Kanskje når me måla, dersom du hjelper oss på veg med gode treningstips?