Anne-Lise: Prosjekt sykkel

– Ja, meiner Gisle Clementsen.

I fjor sykla han Birkebeinerrittet på imponerande 3 timar 14 minutt og 55 sekund. Sykkelturen frå Rena til Lillehammer vart unnagjort i ufyseleg vær med regn og kulde.

Om 204 dagar brakar det laus igjen med Birkebeinerrittet 2011. Då er forhåpentlegvis eg ein av deltakarane. 

Medan Gisle har utallige timar bak seg på sykkelsetet, veit bladfyken frå Strilen knapt bak og fram på sykkel, og endå mindre om korleis ein skal trimma seg i form til denne store styrkeprøven. Det skal det bli ei forandring på.

Gulrot i august
Skal ein koma i form, kan det vera lurt å setja seg eit mål, og gulrota for meg er deltaking i verdas største terrengritt.

I løpet av ei travel helg i august samlar Birkebeinerrittet opp mot 25.000 deltakarar. Rittet er kjent for god stemning og gjev både eliteryttarar, ungdom og vanlege mosjonistar noko å bryna seg på.

Kor mykje ein må trena til turen over fjellet, er avhengig av kva utgangspunkt ein har frå før og kva ambisjonar ein har.

Gisle trener Nordhordland sykkelklubb si ungdomsgruppe, og gjev gjerne bladfyken nokre råd med på vegen.

Start med langkjøring
– Visst du ikkje er i spesielt god form, kan det vera greitt å starta litt forsiktig. Når du syklar brukar du ein del musklar som du ikkje brukar så mykje elles, så kroppen treng litt tid til å bli van med rørslene, seier Gisle.

Rådet hans er å begynna med å trena 3. gonger i veka.

– Begynn med å bygga opp kondisjonen. Litt styrketrening retta mot dei musklane du har bruk for på sykkelen er også bra.

Skal ein sykla lengre distansar er «uthaldenhet» viktig.

– For å bygga opp kondisen vil eg anbefala roleg langkjøring i økter på 1 til 1,5 time. Langkjøringa kan skje på sykkel, men ein kan med fordel også variera litt og springa, gå på ski eller symja. Når du driv langkjøring skal du halda eit tempo som er slik at du klarer å snakka med sidemannen heile tida. Klarer du ikkje det, er tempoet for høgt, seier Gisle.

Han understrekar at den som vil prestera på sykkel, må sykla.

– Du kan ikkje springa deg i form til eit sykkelritt. Du må retta treninga mot den aktiviteten du vil driva med, men i ein tidleg fase i treninga kan det løna seg å variera, og så gå stadig meir over til sykkel utover våren.

Finn deg ei rute
Eit anna råd frå Gisle, er å finna seg ei fast rute å sykla.

– Tek ein utgangspunkt i Knarvik- Alversund-området kan det vera fint å starta med å sykla utover på Radøy og rundt Sæbø. Etterkvart som kondisen vert betre kan ein gjera runden lenger slik at ein syklar om Bø. Når ein har gjort det ein stund, kan det vera lurt å prøva seg på å sykla heile vegen rundt. Nordhordland rundt er nemleg omtrent like lang som Birken. Det er greitt å testa korleis det er å sykla ein slik distanse, sjølv om underlaget og terrenget er annleis enn det ein møter der.
Intervalltrening meiner Gisle at den ferske syklisten kan venta med ei stund.

– Intervalltrening er fint. Du kan godt legga til ei økt i veka med det, men vent til du har bygd opp litt kondis, seier han.

Og med råda til Gisle i bakhovudet har underteikna begynt treninga med to økter langkjøring og ei økt med styrketrening i veka. Ei av øktene med langkjøring går føre seg på sykkel, den andre med joggesko.

I neste utgåve av Aktiv-serien kan du sjå korleis det gjekk, då Strilen var med ungdomsgruppa til Nordhordland sykkelklubb på trening.