Opp av sofaen!

Kjenner du korleis tyngdekrafta pressar deg ned i sofaputane?

Har det lagt seg eit dekke av spindelvev over joggesko og treningstøy?

Fortvil ikkje, no ventar ein sommar med løp på rekkje og rad, der du kan pesa rundt langs asfalt og til skogs, og endåtil kombinert med sykkel og våtdrakt dersom det er triathlon som er «di greie».

Ut i skogen
KnarvikXtrem neste helg går delvis i «Brekkeløypa», men den lengste delen av rundane går i kupert terreng. Løypa er i følgje arrangørane for dei som «vil ha ei ekstra utfordring», med trasé på grus, skogssti, berg/stein og myrlendt terreng

Samla stigning i dette løpet er på kring 400 meter.

Ein må vera fødd i 1996 eller tidlegare for å kunna delta.

Same løypa
Arrangørane av KnarvikXtrem har etter stort påtrykk frå løparar gått vekk frå planen om å laga ein ny trasé for ekstremløpet. På nettsida si skriv arrangørane at løparane helst vil kunna samanlikna tidene sine frå år til år, og for å få dette til vert traseen for løpet den same som dei har brukt sidan 2005.

Vil du sjå nærare på utfordringa finn du løypekartet for KnarvikXtrem på nettet, sjå www.knarvikmila.no.

Påmeldinga til løpet skjer same dag som løpet går.