Allroundpolitikar frå Meland

•    Født: 1949
•    Kjem frå: Holme
•    Partitilknyting: Senterpartiet

«Han er ein aktiv politikar med ei unik evne til innsikt i politiske saker. Han har ofte vore sentral når lokalpolitikarane har diskutert vanskelege saker og han har evna til å sjå sakene frå fleire sider», heiter det i ein nominasjon som Strilen har fått. Og med over 40 år fartstid i lokalpolitikken har Arnold Tveit vore med på litt av kvart.

– Me har tatt mange vanskelege val. Det er ikkje alltid så lett å vera lokalpolitikar, men eg føler det er viktig at nokon engasjerer seg. Eg har alltid hatt lett for å engasjera meg, seier Arnold. 

Han var vel 20 år gamal då han vart med i Senter­partiet, og det gjekk ikkje lange tida før han kom med i styr og stell.

– Då eg var 22 år kom eg inn i edruskapsnemnda og sidan vart det mange ulike nemnder og utval. Dei har bytta litt namn gjennom åra, men eg har no vore innom utval for teknisk/brann, helse og sosial, administrasjonsutvalet og formannskapet. Til saman har eg site 16 år som hovudutvalsleiar.

– Er det spesielle saker som har engasjert deg?

– Å, det er mykje. Det meste eigentleg. Eg er vel det du på godt nynorsk kan kalla ein «allround-politikar». Men det er klart ein gjerne engasjerer seg litt etter kva fase i livet ein sjølv er.  Då eg var yngre, engasjerte eg meg veldig i saker om barnehage og skular. Eg har også engasjert meg spesielt i saker innan samferdsle. Det har eg jo ein del kjennskap til gjennom yrket mitt, seier Arnold, som inntil nyleg sat i kommunestyret.

– Eg er ikkje inne i det nye kommunestyret, men eg synest det har vore veldig spennande å vera med der og har likt det godt. Den siste perioden var eg også gruppeleiar for Senterpartiet og det har også vore veldig kjekt, seier Arnold. Etter så mange år i politikken, opplever han gjerne at folk tek kontakt og vil prata litt politikk både når han fartar rundt som bussjåfør og elles når dei møter på han.

– Det synest eg berre er kjekt. Eg likar å prata politikk og eg synest det er viktig at ein politikar tek seg tid til å lytta til kva folk seier. Du må lika å prata og ha kontakt med folk og det gjer eg absolutt. Eg synest også det er viktig å vera løysingsorientert og eg prøver alltid å vera bevisst på å sjå dei ulike sidene ved ei sak. Det meiner eg er viktig for at ein skal klara å finna gode løysingar, seier Arnold Tveit.