Badeplassen på Fløksand

* Stad: Ligg på Fløksand like ved golfbana i Meland kommune. * Storleik: rundt 27 dekar (inkludert våtmark/leire). * Type: Tilrettelagt badeplass.

Leirfjøra er langgrunn, oversikteleg og fin for dei minste som vil fanga krabbar, flyndrer eller ta seg eit gjørmebad på fjøre sjø. Samstundes kan badeplassen også by på fine forhold for litt større born og vaksne, med stupebrett og treplatting.  Området har status som friområdet og er godt tilrettelagt. Her er det parkeringsplass, toalett og ei lita trebru som gjer at badegjestane kan ta seg tørrskodde bort til badeplassen uavhengig av flo og fjøre. Gangbrua og ein eigen rampe for funksjonshemma, gjer at dette også er ein badeplass som dei fleste kan nytta. Mange er villige til å kjøra bil eit stykke for å nyta denne flotte plassen, og etterkvart som friområdet er vorte betre og betre tilrettelagt, kjem folk kjørande både frå Frekhaug og Knarvik for å bada her. På dei finaste dagane kan det difor vera vanskeleg å finna parkeringsplass, og badegjestane må vera førebudd på å liggja trongt på land, men det ser ikkje ut til å leggja noko dempar på badelysta.