Badestranda på Mo

* Stad: Ligg sentralt og lett synleg i Mo i Modalen. * Type: Tilrettelagt badeplass.

Mange har merka seg denne fine stranda. Skjelsanden er henta utanbygds frå, og mange turistar som kjem hit har høyrt rykte om at den er flydd inn frå eksotiske strøk. Det er ikkje sant, men det er jo ein god historie då, ler folk som Strilen har prata med. Men sjølv om sanden ikkje er så eksklusiv som nokon vil ha det til, er det ein badeplass vel verd eit besøk. Badeplassen er markert med gule bøyer, slik at ikkje båtar skal koma for nært dei badande. Sidan stranda ligg midt i bygda er det kort veg til toalett, butikk, restaurant og andre tilbod som ein kan nytta seg av. Sommarstid er det mange som tek sjøvegen til Modalen, og båtgjestane vert godt mottatt og kan nytta seg av ei fin gjestebryggje.

– Det einaste me ikkje kan skryta av, er badetemperaturen. Det er ganske friskt i sjøen her, men det er jo ei oppleving i seg sjølv, seier ein tilsett i Mo kommune. Og det er kommunen som tek seg av vedlikehaldet av stranda, som vart laga i 1996.