Dugnad i lysløypa

Løypa har jamnt og trutt vorte utbetra og måler i dag 3,3 kilometer. Sidan 1982 har det vorte arrangert eit uttal skirenn og treningar i den snørike dalen, og endå fleire skiløparar har gått i ring i lyset på Hopsdalsmyrane.

Det har dei kunna gjort avdi Sellvold og Reigstad har tatt på seg ansvaret som brøytemannskap, skriv ein lokal skiløpar som føreslår dei to som beste eldsjeler i Strilen si kåring. «I dag er dei begge pensjonistar, men ingen av dei ha trappa ned dugnadsinnsatsen av den grunn. Tvert i mot. Det er nesten større sjanse for å treffa Arvid og Reidar i lysløypa på Hopsdal enn heime i Knarvik», heiter det i grunngjevinga.

I periodar er dei to å sjå dagleg i skiløypa, anten for å jobba og inspisera, eller for å planleggja nye prosjekt. Heile året, sommar som vinter, er det nok som må gjerast, anten det er attlegg, gjerde eller maskinpark som må vølast, eller grøfting og vedlikehald av sjølve løypa. Når dei får spørsmål om kva utstyr dei hadde på 80-talet, ler begge litt.

– Den første sporkallen me hadde, var ein sogning, fortel dei. Det var Helge Brekke som ordna heimelaga utstyr som han fauk rundt løypa med for å ordna spor. Sidan den tid er det kjøpt inn både trakkemaskin og snøscooter. Men nokon må ta ansvaret, og det gjer dei to. Så kjem snøen, er det på nytt klart for å gå på ski i lysløypa på Hopsdal.