Ei enorm utvikling

Rema 1000 Knarvik
•    Opna: 1994
•    Dagleg leiar: Tone Eide
•    Tilsette: 38
•    Butikktype: Daglegvarer

– Det var 24. november 1994 klokka 10. Kassene ville ikkje fungera i starten, så det vart litt meir spennande enn me hadde tenkt, flirer ho.
I dag er historia eit artig minne.

– Då me starta i Knarvik, ante me ikkje kva me skulle forventa, men det har gått bra. Heilt fantastisk bra, seier butikksjefen.

Butikken har vakse mykje sidan starten og har i dag dobbelt så stort lokale, og tre gonger så høg omsetning som den gongen.
På ein vanleg dag er om lag 1500 kundar innom butikken.

– Kva kjenneteiknar din butikk?

– Me har ein stor butikk med god plass. Det gjer butikken oversiktleg og me har bra utval av daglegvarer. Me fokuserer på låge prisar. Butikken ligg også svært sentralt og har stor parkeringsplass. Eg trur at det er ting som gjer at mange vel oss. Eg synest også me har veldig hyggelege tilsette og godt miljø her, det håpar eg også kundane merkar, seier Tone.

– Kva forventningar trur du folk har når dei kjem inn i butikken din?

– Eg trur dei har mykje dei same forventningane til alle typar butikkar. Folk er opptekne av at dei finn dei varene dei ønskjer og at dei får god service, og det gjer me vårt beste for å gje dei.

Det vert også framheva av lesarane som har nominert butikken til Strilen sin konkurranse.
«Kjempebra butikk, hyggeleg betening, god hjelp om du treng det og ikkje minst god parkering», skriv ein lesar.
Ein annan brukar stikkord som «triveleg, romsleg, oversiktlig og billig!».

– Møter de på spesielle utfordringar i kvardagen?

– Ja, konkurransesituasjonen er tøff i daglegvarebransjen og det er mange av oss i Knarvik-området. Å vera stor har sjølvsagt mange fordelar, men det byr også på utfordringar.

Det er mykje varer som går inn og ut av butikken i løpet av ein dag. For store butikkar kan det også vera ei utfordring å få tak i nok av sesongvarer som julemat og grillmat, me er avhengige av at dei som leverer til oss kan levera store kvantum, seier Tone.

Butikken har i dag 38 tilsette. Nokre av desse har vore med frå starten.

– Det synest eg er veldig stas. Folk jobbar ikkje så lenge på ein stad, viss ikkje dei trivst, og kundane har mykje å seia for trivselen vår. Sjølv om det er veldig mange kundar innom her i løpet av ein dag, føler eg at me får god kontakt med folk. Mange går her kvar dag, og vekslar gjerne nokre ord med oss i kassen og helser på oss når dei møter deg på gata. Det gjer arbeidsdagen vår triveleg, seier Tone.