Fedje si femte ­statsmakt

•    Starta: 1980
•    Medlemmar: 15-20
•    Heldt til: rundt om kring på Fedje
•    Aktivitetar: revy/teater

Dei er ikkje mange, men dei leverer revy kvart einaste år. I tillegg stiller dei opp med poengterte spark på merkedagar som eldredag, 17. mai, verdsdagen for psykisk helse, opning av NAV-kontor med meir. Det har dei gjort sidan 1980 og Aase Borge har vore med heile tida.

– Sist revy samla me 350 menneske. Det er ein oppmøteprosent få andre kan matcha, seier teaterhøvdingen.

Ho teiknar eit bilde av ei teaterlag fullt av spillopper.

– Me er ikkje lette å styra og me driv sjeldan med planlegging, men utruleg nok har det vorte revy kvart einaste år i tretti år og me vert like overraska over at me får det til kvart einaste år.

Teaterlaget skriv så å seia all teksten sjølv.
– Nokre år har me mykje å skriva om, andre gonger er det verre, men me kjem alltid i mål, seier Dagrun, som har plakatar frå revyane dei siste åra hengande på ein vegg heime.

Revyane har fått titlar som «Kystverket og andre plager». Ein revy som vart til etter Server-forliset, «Eit kabla liv». Som viser til kabelferja på øya som skapte ein solid dose avisoverskrifter for ei tid tilbake og «Full i F(edje)!, «So lengje skuto kan ga»og «I hytt og vêr.

Og revyane som når ut til folket er gjerne rykande ferske.
– Server gjekk på grunn berre to veker før årets revyen. Den gav oss så mange poeng at me la vekk omtrent alt anna me hadde av tekstar og laga nye, kan Dagrun fortelja.

Teaterlaget har også gjort det til ein tradisjon å reisa til revyfestivalen på Fedje, og sjølv om laget er blant dei minste som deltek, har dei henta med seg fleire prisar heim. Eit år sikra laget seg pris for beste monolog. Eit anna år for beste sketsj.

– Revyfestivalen på Fitjar er utruleg kjekk. Der møter me mykje folk og har det grådig moro. I laget vårt har me aktive medlemmar frå 18 til 77 år, og me meiner at spreidning i alder er ein stor fordel. Då har me alle litt forskjellig blik på livet, og saman leverer me ein revy med tekstar som når alle aldersgrupper, meiner Dagrun.

God kontakt med andre revygrupper i distriktet har dei også.

– Me har hatt ein del samarbeid med dei som lagar revyen både på Austrheim og på Lindås. Me har vore gjestar i kvarandre sine revyar og lånar eller kjøper gjerne litt stoff av kvarandre. Å møta andre som driv på med det same er veldig artig, og så er det grueleg gøy med revy. Både for oss og publikum, håpar me, avsluttar teaterhøvdingen.