Folkefest i snart 30 år

Av alle arrangement som går av stabel­en i Nordhordland er nok Knarvikmila det største og mest kjente. Og det manglar ikkje på gode argument for å stemma på Knarvikmila. I år etter år har arrangementet samla tusenvis av menneske til løps- og folkefest i september månad. 

Frå ein sped start i 1983 har «Knarvikmila-general» Helge Brekke og hans mange medhjelparar utvikla «mila» til eit tilbakevendande arrange­ment som verkeleg set Nordhordland på kartet.

Opptakten til Knarvikmila kom i 1981, då det første Knarvik Games vart arrangert. Då stod kring 9000 til­skodarar på steinknausane rundt Knarvik Stadion og heia fram både Henry Rono og Paula Fudge til verdsrekordar på 5000 meter.

Frå 1983 tok folkeløpet Knarvikmila over for Knarvik Games. Steg for steg har «mila» utvikla seg til å omfatta fleire distansar, naturløype, Ungdomsløp, Minimil for dei yngste og halvmaraton for dei som vil slita litt ekstra.

Gjennom god marknadsføring og flotte premiar har talet på deltakarar kome opp på eit høgt nivå, ikkje berre frå lokalmiljøet. Mange kjende løparar, også frå andre land, har delteke.

I år var verdskjente Haile Gebrselassie frå Etiopa med på å setja eit ekstra preg på arrangementet.

Knarvikmila har heile tida hatt «Idrett utan alkohol» som eit viktig motto. I tillegg til løpa har trening, rett kosthald og andre tema vore teke opp på seminar i tilknyting til arrange­mentet, og mila har også medverka til mange flotte konsertar med kjende namn på plakten.