Folkeleg og syngande ordførar

•    Født: 1963
•    Bur: Knarvik, kjem frå Karmøy
•    Partitilknyting: KrF

Dei handlar alle om Astrid Aarhus Byrknes. For fire år sidan tok ho over jobben som ordførar i Lindås kommune, og Astrid har vore ein synleg ordførar. Ho har vore høgt og lågt på det meste som har rørt seg i kommunen, og det er det mange som har lagt merke til.

– Ho viser seg ute blant folk og ho er veldig lett å prata med. Det betyr mykje at politikarane er der folket er og at du føler at du kan nå fram til dei. Ho er alltid blid og hyggeleg og så er ho flink å synga, seier ei kvinne, som har ringt avisa for å fortelja at ho meiner Astrid er ein veldig god kandidat til tittelen.

I ein e-post skriv ein annan lesar at ho føler Astrid tek folk på alvor og engasjerer seg i saker som engasjerer eldre. Slik som Lindåstunet. Ho kjempar for det og for at dei eldre skal ha det godt, skriv lesaren.

– Det er kjekt at folk oppfattar meg slik, seier Aarhus Byrknes i ein kommentar til Strilen. Ho kom inn i kommunestyret i Lindås i 2007 og fekk ein brå start då ho gjekk rett inn i ordførarvalet.

– Det har vore ei bratt læringskurve for meg. Eg har lenge vore politisk interessert, men det er først dei seinare åra at eg har vore medlem av eit politisk parti. Eg var med i KrF ei lita stund som ungdom og så melde eg meg inn att for ikkje så mange år sidan. Då eg bestemte meg for å gå i politikken, fekk eg tre gode råd av ein eldre politikar. Han sa til meg at eg alltid måtte vera meg sjølv, at eg måtte vera raus og leggja vekt på samarbeid og lytta til folket. Det synest eg var gode råd, og dei har eg følgt.

– Har du nokon idé på kor mykje tid du brukar rundt om kring på ulike arrangement?

– Nei, det har eg inga aning om, men eg meiner frivillig arbeid er limet i samfunnet vårt. Det er også grunnen til at eg stiller opp på så mykje forskjellig. Eg går også på arrangement der eg ikkje er spesielt invitert, rett og slett fordi eg har lyst å få dei med meg, seier Astrid, som er glad for tilliten folk viste henne og partiet under valet.

– Eg ser fram til å ta fatt på fire nye år som ordførar og eg vil halda fram med å stilla opp på ting i same grad som før, seier ho.