Fredagskaféen til topps

– Det er ein plass på møtast, slik at folk slepp å sitja heime og slaska!

Det er svaret Strilen får når me spør Silje Iren Sollibakken og Ida Haarklau kvifor så mange kjem på klubben i kyrkjekjellaren på Ostereidet fredag etter fredag.

Mellom 50 og 70
Frammøtet er oftast mellom 50 og 70 unge i ungdomsskulealder, og ein del som går på vidaregåande.

Og dei yngre som styrer klubben, synest det er det er fint å ha med seg ein del vaksne leiarar.

– Dei er litt meir erfarne og er gode å ha og spørja av og til, seier Silje Iren.

Kom sterkt
Før innrykket no på fredag er Silje Iren og Ida i gang med ein litt spesiell jobb, saman med ein av dei vaksne leiarane, Laila Hindenes:

Dei laga ein stor plakat som fortel at den kristne klubben er kåra til «Beste ungdomstilbod» i Strilen si nest siste jubileumskåring. Plakaten vert hengt opp på veggen, som bakgrunn for både Strilen sitt foto og til info for medlemane som kjem litt seinare.

I nett-kåringa til Strilen var det lenge Nordhordland Røde Kors sitt ungdomstilbod som leia. Men den store medlemsmassen i Fredagskafeen har tydelegvis sett seg i sving og fått mange til å stemma.

– Me kom sterkt i innspurten, kan ein av dei mangeårige leiarane, Odd Molvik, slå fast.

Først for konfirmantar
Fredagskafeen har utgangspunktet sitt i ein klubb for konfirmantar, som starta på slutten av 1980-talet.

– Dei synest dette var så kjekt at tilbodet gjekk over til å verta kalla «samlingar». Så har det vorte ein glidande overgang til den kristne ungdomsklubben me har no, fortel Odd Molvik.
Klubbar kan også få nedturar, og det gjorde også denne klubben litt utpå 90-talet.

– Nokre år var me nesten nede i null medlemar. Så i staden for å samlast kvar 14. dag, gjekk me over til kvar fredag, slik at dei unge hadde eit fast haldepunkt. Frå kring 1996 tok oppmøtet seg kraftig oppatt, fortel Molvik.

– Nesten for mange
No er klubben populær som aldri før. Odd Molvik synest det er flott at kring halvparten av dei som går på ungdomsskulen på Ostereidet, er med i klubben.

– På den første samlinga i haust kom det 85, og det vart nesten for mykje av det gode. Eg vil rosa både dei vaksne og dei unge leiarane, og dei som faldar hendene og ber for at det skal gå bra for klubben, seier Molvik.

Dei som hadde kjøkkenøkta på fredag, styrte med å laga til taco. Det var menyen på årets juleavslutning i klubben, saman med is og julebrus.