Fristad med trygge leiarar

Fritex Ungdomsklubb inviterer ungdom til Verås Grendahus stort sett annankvar fredag gjennom skuleåret.

– Dette er eit supert tilbod til alle ungdommar frå 6. – 10. klasse. Dei har biljard, bordtennis, x-box, nintendo wii, airhockey, diskotek og kiosk, skriv Andreas Waage som har nominert klubben.

Klubben er driven på rein dugnad, og engasjementet har gått i arv i alle fall i ein generasjon så langt. Opningstida er 18.00 til 21.30. Kor mange som kjem kvar gong varierer frå over 100 ungdommar til rundt 10. Seks leiarar stillar opp kvar gong, og dei hentar inn fleire om det trengs.

– Dette er eit godt alternativ til å driva dank på Lindås, Fonnes eller andre senter i distriktet, skriv Andreas.

Aleksander Vatle Waage, Maya Vabø Mongstad og Anders Rolland Jacobsen er nokre av dei frivillige leiarane som har gått frå å vera deltakarar, til ungdomsleiarar og no, vaksenleiarar. Anders byrja å komma til klubben då han gjekk i 6. klasse.

– Eg synest det var kjekt å komma og vera med vennene mine frå skulen på ein annan arena. Eg vart med i styret då eg var 15. No er eg 21 år, og det er framleis kjekt å arrangera dette for dei som no er yngre, seier han.