God på frivillig arbeid?

– KRIK Radøy må vera Nordhordlands beste frivillige organisasjon. Den vert drive av ungdommar og har samling i Radøyhallen annankvar fredag. Der kjem det mange ungdommar. Dette er eit tilbod som skal gje ungdom valfridom og ikkje berre la det gå i drikking og festing, skriv David Aasgard i ein e-post til Strilen.

Han er ein av dei som så langt har nytta sjansen til å nominera ein kandidat til konkurranse Nordhordlands beste.

I mars månad skal Strilen kåra Nordhordlands beste frivillige lag/organisasjon, og no jaktar me på gode kandidatar til konkurransen.

Frivillig arbeid og dugnadsand betyr mykje for tilbod og trivselen i bygdene våre og i jubileumsåret vårt vil me gjerne gjera litt stas på lokale lag- og organisasjonar som utmerker seg på ein positiv måte.

No har du sjansen til å fremja ditt idrettslag, husmorlag, korps, velforeining eller liknande.

Dersom du veit om ein god kandidat, så set me stor pris på om du sender oss ein e-post med informasjon om kvifor du meiner at akkurat denne kandidaten fortener litt ekstra merksemd.

Forslag kan sendast til beste@strilen.no, skulle du ikkje ha tilgang til internett er det også muleg å ringja inn ditt forslag på telefon 56 34 30 46.

Dersom din kandidat skal vera med i vurdering, må forslaget nå oss innan søndag 6. mars.