Gulen dykkesenter

– Fordi dei tilbyr ei enorm oppleving. Du får sett store delar av både Gulen og Lindås ved havsafari. Ein kan ta dykkekurs, kjøra tube, få oppleva Gulatinget og mykje meir. Det er kort veg til Eivindvik og Dingja, mykje fin natur og høve til mange fine fjellturar. Dette skriv Maren Fagervik i ein e-post til Strilen om kvifor ho meiner dykkesenteret fortener tittelen Nordhordlands beste turistattraksjon.

Gulen dykkesenter er drive av Ørjan Sandnes og Monica Bakkeli, han frå Gulen, ho frå Bergen. Begge er dykkeinstruktørar, og begynte i det små med å ta elevar med seg på tur. I 2001 prøvde dei seg på helgebasis, og i 2004 flytta dei frå Bergen til Gulen for å driva på fullt.

– Målet var å skapa to arbeidsplassar på fulltid og driva heilårleg. Det har me, som einaste feriesenter i Noreg klart, seier Monica stolt.

I starten tilbydde dei mest vassport, men etter kvart spissa dei det meir mot dykking. No gjer dei begge deler.

– Me er best på dykking, men elskar alt det andre óg, ler Monica, som har begynt å kalla det livsstil i staden for jobb.

Ho fortel at senteret er minst kjent lokalt, men veldig kjent utanfor kommunen og i miljøet i heile Skandinavia.

– Me har hatt gjestar frå 54 land her. Nett no har me hollendarar, russarar og tsjekkarar, seier ho.

At dei kan halda det gåande om vinteren også, skuldast Golfstraumen. Den gjer at sjøen held eit par grader på overflata og 7-8 lenger nede. Dessutan er sikta klar som dagen, fortel ho. Dykkinga føregår både i Solund, Gulen, Fedje og Lindås.

– I Lurefjorden for eksempel, dykkar me etter Periphylla midt på natta. Utruleg tøft, seier ho. Vrakdykking eller straumdykking kan dei også ordna.

Den dårlegaste dykkemånaden er mars på grunn av algar og dårleg sikt. Men så fekk dei ganske tilfeldig dokumentert at dei har flest nakensniglar i heile Skandinavia like utom kaien. Og dei er største i mars. Etter det har dei blitt nedrende av undervassfotografar frå heile verda.

Når Monica først har sjansen til litt tekstreklame, hiv ho på at dei også har den einaste puben i Gulen som er open heile året.