Har mora i snart 20 år

– Me starta som ein del av kultur­dagane i Meland i 1992, men no står me på eigne bein, seier Steinar Erstad til Strilen.

Han har vore med frå starten og har etter kvart vorte ein gjennomgangsfigur i revyen i rolla som Melandsmonsen. Ein annan gjennomgangsfigur er Inge Åsebø som vaktmeister.
Revyen tek for det meste opp store og små ting som har skjedd i kommunen, og som oftast med ein humoristisk vri. Nummera er stort sett skrivne av folka i revygjengen, som utgjer 15 – 20 personar.

– Det har sjølvsagt kome til nye folk etter kvart, men me er ein gjeng som har vore med frå starten, seier Erstad.

Blant dei er Brith Hansen, Arne Brakstad, Inge Åsebø og Evy Dale, som og var den første instruktøren for revyen. Seinare har dei hatt fleire instruktørar, men i det siste er det Ivar Hopland som har hatt denne funksjonen.

Av spesielle høgdepunkt vil Erstad trekkja fram visa »Hekle-Guri», som vann førstepremie på ein revyfestival på Fitjar.

Revygjengen øver i ungdomshuset på Dale, men revyen vert framført i ulike ungdomshus rundt i kommunen, stor sett fire plassar kvart år.

Det vert laga nye revyar kvart år, bortsett frå eitt år då det vart framført eit skodespel i staden. Revyane vert spela på vårparten.

– No er me i gang med å planleggja neste års revy, som vert som eit 20-årsjubileum, seier Steinar Erstad.

Ein vurderer og å prøva å få til ei eiga ungdomsgruppe.