Har sett spor etter seg i ­Masfjorden

•    Fødd: 1948
•    Bur: Seim og har budd mange år i Masfjorden
•    Partitilknyting: Tidlegare KrF-politikar

I 1983 flytta ho og mannen til Masfjorden og alt i januar året etter vart ho valt inn i kulturstyret.

– Eg var ikkje så god då eg fekk vita det. Eg vart valt inn utan at eg var spurt om det først, men i ettertid er eg glad for det. Fordi det var eigentleg då ballen begynte å rulla, kan Kari fortelja. Til neste val kom ho også inn i kommunestyret for KrF og der sat ho inntil i fjor då ho og mannen flytta tilbake til barndomsheimen på Skår i Seim.

– Den innsatsen og engasjementet Kari har lagt ned i styre og stell i Masfjorden, fortener litt merksemd. Det meiner Masfjorden KrF som har nominert henne til tittelen Nordhordlands beste politikar.

Kari Skår Sørheim har sett spor etter seg i Masfjorden gjennom sitt engasjement både som politikar og som privatperson.

– Tida som lokalpolitikar har lært meg mykje. Eg har vore heimearbeidande i 25 år og politikken gav meg ei rolle utanfor heimen og kyrkjelydsarbeidet. Nokre gongar har eg vore så trøtt og lei at eg har hatt lyst til å gje meg, men det har også gitt meg mykje og eg må innrømma at eg saknar det no når eg har flytta frå Masfjorden. Spesielt no i valkampen, seier Kari.

Ho har spesielt engasjert seg for born og unge sine oppvekstvilkår i kommunen.

– Eg har også gjort erfaringar i livet, som gjer at eg har fått eit spesielt hjarte for svake grupper i samfunnet. Det engasjerer meg sterkt. Det føler eg at også KrF gjer, og eg opplever absolutt at eg har hamna i rett parti.

Partikollegaene i Masfjorden omtalar Kari som ein dame det er lett å samarbeida med.

«Ho utrykkjer seg klårt og lett forståeleg og ho har vore ei inspirasjonskjelde for oss», skriv Jon Hope i ein e-post til Strilen.

Han kan også presentera ei imponerande liste med verv som Kari har tatt på seg. Ho har blant anna site fire periodar i formannskapen, vore vararepresentant på Stortinget og ho har tatt si tørn med verv i partiet. Kari gjorde også sitt for å få Havforskningstasjonen til Matre. I tillegg har ho engasjert seg frivillig for kyrkja og misjonen og blant anna drive barneforeining heime i prestegarden. I dag er det leiarvervet i Misjonsselskapet (NMS) som tek mykje av tida hennar, og ho er ikkje lenger aktiv i politikken.

– Når du er så vaksen som det eg er, så rekk du ikkje over alt lenger. Sjølv om eg har likt å driva med politikk, så føler eg at det er andre ting eg må prioritera no, avsluttar ho.