Hellisøy beste attraksjon

Kvar månad i jubileumsåret invite­rer avisa lesarane med på å kåra Nordhordlands beste i ulike kategoriar. I august har Hellisøy fyr konkurrert med mellom andre Lyngheisenteret og Gulen dykkesenter, om å få flest stemmer som den beste turistattraksjonen.

– Me fekk med oss fastbuande, hyttefolk og fråflytta fedjingar til å stemma på fyret, seier Trond Ågotnes.

Patriotisme
– På Fedje er folk patriotiske, og dei støtta opp med sine stemmer, seier Ågotnes, og legg til at alle vart oppmoda til å ikkje gje fleire stemmer frå ulike datamaskiner.

Saman med kona Lene Renate Ågotnes driv han Pernillekafeen på Fedje og Fedje Turistinformasjon, og det er gjennom dei at turar til fyret vert organiserte.

– Fyrtårn
– Nordhordland reiselivslag brukar Hellisøy fyr som nettopp eit fyrtårn i si marknadsføring av Nordhordland, seier Fedje-ordførar Kristin Handeland.

Det er kommunen som i dag eig fyret, men drifta er det Fedje Turistkontor som står for, etter at andre har hatt drifta tidlegare.

– Elles er det viktig å nemna dei som gjorde ein stor dugnadsinnsats for å restaurera fyret, då det vart ledig etter automatiseringa.

Særleg gjekk Rolf Rognsvåg i spissen for dette restaureringsarbeidet, seier Handeland.