– i stadig utvikling

•    Opna i 1956, ombygging/tilbygg i -58, -64, -72 og 89.
•    Elevar: 376 elevar
•    Tilsette: 70 tilsette
•    Rektor: Espen Storstrand
•    Skuletype: Barneskule med 22 klassar

Også innanfor skuleveggane vert det jobba med forbetring.
– Dei siste 4-5 åra har det vorte gjort eit stort arbeid innan utvikling, i første rekke innan vurdering, seier rektor Espen Storstrand.
Sjølv starta han som Alversund-rektor i haust, og vidarefører det arbeidet som andre starta opp før han kom.
– Vurdering inneber at elevane er med og reflekterer over kvar dei er i læringsprosessen, og saman med læraren stakar ut kursen vidare, og set seg mål for korleis dei skal jobba, seier rektoren.
Skule i dag handlar ikkje berre om at læraren skal kunna seia at han eller ho har vore gjennom læreboka, men også ei bevisstgjering på kva eleven skal gjera, og kvifor eleven skal læra det eller det.
– Tilbakemeldingane skal gå direkte på eleven og det arbeidet som er gjort. Ikkje berre at det er flott, men kva er eit godt arbeid? Og så skal me gje framovermeldingar, som seier noko om korleis eleven skal jobba framover, seier Storstrand.
– Det at me har fokus på utvikling og å forbetra oss, gjev ringverknader også utanfor sjølve arbeidet med vurdering. God læring gjev også eit godt miljø, slik at om me har fokus på læring som det viktigaste så går ikkje det ut over det sosiale miljøet. Me kan jobba med begge delar samstundes, seier Storstrand.
I nominasjonane vert godt miljø mellom elevane, og mellom lærarar og elevar, dregne fram som argument for nettopp Alversund. Utanom skuletid har elevane vist fram både cabaret og no seinast sirkus.
– Det er kjekt at ein innimellom kan få til ting som lærarar og elevar saman har lyst til å gjera. Me har også eit aktivt elevråd som tek initiativ til ulike aksjonar, seier Storstrand.
På kveldstid har foreldra nyleg vore inviterte til informasjon om barn og internett, eit opplegg som Barnevakten står for. Data er det også i klasseromma, der det mellom anna er elektroniske tavler i 15 av 22 klasserom.
– Skulen brukar It`s learning, som er ei læringsplattform på nett. Og via heimesida på nettet prøver me å fortelja litt om kva me driv med på skulen, gje eit blikk inn i klasserommet, seier Espen Storstrand.