Ikkje redd for å stilla spørsmål

•    Født: 1962
•    Kjem frå: Hjelmås
•    Partitilknyting: Høgre

Ho har vore politisk engasjert sidan ho var 20 og site i kommunestyret i to periodar. No er ho klar for ein tredje, denne gongen også med vervet som varaordførar.

At politikarar vågar å ta dei vanskelege diskusjonane, er veldig viktig, meiner den som har foreslått May Eva til tittelen beste politikar. Høgre-politikaren vert skildra med stikkord som roleg, rettferdig, sakleg og grundig. Dei som har følgt med i lokalpolitikken, har nok fått med seg at May Eva spelte ei sentral rolle i diskusjonen om lokaliseringa av Nav-kontoret i Lindås. Saka hamna i kontrollutvalet og May Eva Sandvik stilte mange kritiske spørsmål. «Det krev styrke og mot å gå inn i ei slik sak på den måten ho gjorde», heiter det i nominasjonen.

May Eva nektar ikkje for at ho kan vera ganske bestemt, når ho vert skikkeleg engasjert.

– Men det er eg ikkje åleine om altså. Det er mange politikarar som er det, og det er eg glad for. Eg trur det er ein grei eigenskap, seier May Eva.

Ho legg også vekt på å vera ryddig, ærleg og løysingsorientert.

– Og så synest eg at det er viktig at me som politikarar evnar å skilja sak og person og lyttar på kvarandre også når me er ueinige. Og så må me sjølvsagt lytta til folket. Det er jo dei me gjer denne jobben for, oppsummerer ho.

I siste periode har May Eva Sandvik vore leiar i Leve­kårsutvalet og tema som skule og pleie og omsorg engasjerer henne sterkt. Ho synest også samferdsle, næring og kultur er spennande tema.

– Eg har likt meg godt i begge periodane eg har site i kommunestyret. Men dei to periodane har vore veldig forskjellige fordi den økonomiske situasjonen i kommunen har endra seg mykje. Dei fire første åra var økonomien anstrengt og me følte me måtte kutta mykje. Det var tøft, men også veldig lærerikt. Den siste perioden har økonomien vore langt betre og då har det vore litt lettare. Det har ingenting med kven som har styrt i dei to periodane å gjera, men skuldast rett og slett at me fekk betre økonomi etter oppjusteringa av skattetaksten på Mongstad. Det er kjekt å ha litt pengar å fordela i staden for å berre kutta og kutta.

Lindås kommune har dei siste åra vore gjennom mykje planarbeid.

– Eg føler eg har fått vera med å leggja mange spen­nande planar, og eg har veldig lyst å vera med når me etterkvart får sjå resultata av dette i praksis. Difor vart eg fantastisk glad for den tilliten folk viste oss under valet og for at eg får vera med vidare i kommunestyret, seier ho.