Inkluderande ­naturopplevingar

– Nordhordland Padleklubb tilbyr ungdom ein arena for meistring og gode opplevingar, skriv Kristin Sommerschild, som nominerer klub­ben ho er treningskontakt i.

Padle­klubben har kjøpt inn ti polokajakkar med tilhørande utstyr, som primært vert brukt av ungdom. Ti jenter og nokre gutar frå Eknes i Lindås er i gong med kombinert havkajakkleik og polotrening og dei har gjort avtale med Puddefjorden kajakklubb om felles bassengtrening i vinter.

– Me er veldig opptekne av å få med ungdom som ikkje er med på fotball eller anna idrett, seier Audun Håland som har tittelen «inkluderingsminister» i klubben.

Nordhordland Padleklubb har som mål å verta nummer ein på inkludering, og dei har gjort mykje for å gjera målet til realitet. Dei har arrangert eit 16-timars grunnkurs i havkajakk for utviklingshemma og deira støttekontaktar; dei har gjennom utstrakt samarbeid med fleire aktørar arrangert eit 40 timars for å gi støttekontaktar ekstra kompetanse og motivasjon som støttar inkluderingsarbeidet, og dei har gitt padle- og symjeopplæring til unge gutar og jenter frå Eritrea gjennom eit samarbeid med NAV.

For dette arbeidet har Hordaland Idrettskrets nominert Nordhordland Padleklubb ved Audun Håland til inkluderingsprisen 2011.