Innsats som kan redda liv

•    Medlemmar: Om lag 1500, ca 40 av desse er aktive
•    Aktivitet: Hjelpekorps og ungdomsgruppe med ulike aktivitetar

– Hjelpekorpset syter for tryggleik på store arrangement, arrangerer førstehjelpskurs og stiller mannskap til redningsaksjonar, seier Kaj Johanesen.

Han har vore engasjert i den lokale avdelinga for Røde kors i sju år og kan fortelja om 35-40 svært aktive medlemmar.

– Nokre av medlemmane våre legg ned 1000 timar i året i frivillig arbeid.

Og Røde kors er på plass under mange lokale arrangement. I Austrheimløpet, Nordhordland rundt, på Knarvikmila, på Havsportveka og på vakt i vinterfjellet på store utferdsdagar.

– I hjelpekorpset gjer me alt muleg frå å plastra gnagsår til å rykkja ut på leiteaksjonar i fjellet. Mannskap frå oss rykka mellom anna ut då tyske studentar fekk problem tur til Kalvedalen for ei tid sidan og me bistår med folk og utstyr til aksjonar i heile Bergens-området. Dei siste åra har me oppdatert utstyret vårt ein god del og har blant annan gode snøskutarar som er til god hjelp på oppdrag i fjellet, kan Kaj fortelja.

Nordhordland Røde kors vart til for ein del år tilbake då foreiningane i Austrheim, Meland og Lindås slo seg saman.

– I dag dekkjer me heile Nordhordland. Det er ikkje mange lokallag som dekkjer eit så stort område. Her hjå oss har me mykje fjell og mange fjordar og me er rusta til å rykkja ut på mange typar redningsoppdrag, seier Kaj.

Sjølv er han med i hjelpekorpset. Det har lengst tradisjonar i distriktet vårt, men i den seinare tid har den lokale avdelinga også fått si eiga ungdomsgruppe.

– Røde kors ungdom tilbyr ungdom som treng å bygga opp eit sosialt nettverk ein møteplass. Ein møteplass der ein får informasjon om alt frå lokale saker til problem på verdsbasis.

Me har mange samlingar og har det kjekt i lag. I begge avdelingane får medlemmane tilbod om veldig gode kurs. I Røde kors finn du mange medlemmar som bruker mangfaldige gratistimar på å gje folk eit godt tilbod og eg meiner at dei absolutt fortener å få vera med i ein slik konkurranse, skriv Stig Krossøy Nordvik, som har nominert den lokale Røde Kors-gruppa til konkurransen.