Krik mot alkohol

– Tilbodet skal også vera ei motvekt mot den drikke­kultur­en som mange vaksne står for, seier David Aasgaard, som har kome med framlegget på KRIK Radøy som det beste ungdomstilbodet i Nordhordland.

Aasgard skriv i si grunngjeving at samlingane i Radøy­hallen er eit lågterskeltilbod der ein får driva med idrett, leikar og moro for alle på ungdomsskulen og oppover, anten ein er idrettsutøvar eller glad i sofakroken.

– Dei som kjem, er både jenter og gutar frå 8. klasse og oppover i 20-åra. Dette er eit godt tilbod for alle som vil gjera noko gøy ein fredagskveld, reklamerer Aasgard.

Kveldane startar med aktivitar som «Stiv heks», ulike andre leikar og fysiske aktivitetar som fotball.
– Så har me ein pause midt i økta med andakt, song og gjerne informasjon om leirar som KRIK tilbyr.

Kristen Ungdomskontakt er ein landsdekkjande organisasjon som ønskjer å bevara, inspirera og vinna idrettsfolk til kristent liv både i idrettslag og menigheitar. 

– KRIK sitt viktigaste arbeid er la alle få høyra om Jesus og nestekjærleik og kva me kan gjera for ei betre verd. Ein må ikkje vera kristen for å komma, men me legg vekt på at det er viktig å få med seg den korta andakta midt i treninga, seier Aasgard.

Kor mange som kjem på kveldane, varierer litt etter kva anna som skjer.
– Men me har med oss ungdommar både frå Austrheim, Lindås og Bergen i tillegg til Radøy,

Aasgard peikar og på at mange som har kome på vidaregåande, vil vera med vidare i KRIK og tek leiaransvar ved å hjelpa til med avviklinga av kveldane.

– Eg synest det er veldig positivt at dei på denne måten får ein eigarskap til tilbodet, seier Aasgard.