– med vekt på verdiar

•    Opna: i 1999. Ungdomsskule frå 2003
•    Elevar: 78
•    Tilsette: 30
•    Skuletype: Privat barne og ungdomsskule
•    Rektor: Olav Sollid

«Rektor er fantastisk hjelpsam og seier ikkje nei nesten uansett når på døgnet ein tek kontakt og lærarane er blide og positive. Ein ser verkeleg at dei jobbar og er opptekne av borna», skriv ei mor som har fleire born på skulen.
Ho meiner at denne skulen absolutt er ein god kandidat til tittelen Nordhordlands beste skule. 
Nordhordland kristne grunnskule er ein privat kristen grunnskule som ligg i Alvermarka.
– Det som er mest spesielt med skulen vår er nok at den har ein klar kristen profil og legg stor vekt på verdiar, seier Kåre Eide i administrasjonen på skulen, og det er rektor Olav Sollid heilt einig i.
– Mange foreldre seier til oss at me er flinke til å sjå kvar enkelt elev og me trur og håpar at det stemmer. Det er nemleg noko me legg stor vekt på. Me trur at Gud har skapt kvart menneske unikt og me meiner at kvar enkelt elev er spesiell, me strekkjer oss difor langt for å tilrettelegga undervisninga så elevane får utvikla sine evner på ein god måte, seier rektor.
Han fortel at skulen også stiller klare krav til elevane.
– Det siste året har me jobba mykje med reglane på skulen vår. Me krev at elevane våre viser respekt for kvarandre og lærarane, og legg vekt på allminneleg folkeskikk. Me opplever at me har veldig engasjerte og interesserte elevar og foreldre. Det er bra samhald på skulen både mellom lærarane og elevane og undersøkingar visar at miljøet her er godt.
Elevtalet på skulen har auka jamt og trutt sidan starten.
– Mesteparten av tida me har drive skule her har me vore ganske små. Det er mange fordelar med det. Med små klassar har ein god oversikt og det er lett å gjera aktivitetar saman som skule. Det har me utnytta. Me har reist på mange turar. Gått frå hytte til hytte på Hardangervidda, reist på tur i Stølsheimen, sykla Rallarvegen og gått på Gald­høpiggen. Det er veldig kjekt, seier rektor. Han kan også fortelja at musikk for mykje fokus på skulen.
– Me har ein veldig dyktig musikk­lærar og har kjøpt inn ein god del instrument som elevane får læra å spela. Song og musikk set sitt preg på kvardagen vår.
Skulen starta opp i eit bygg som tidlegare husa næringsverksemd, og etter kvart som elevtalet auka vart det trongt om plassen.
– Me har bygd mykje ut og det har vore litt av ein kabal å driva skule midt i eit i ombyggingsarbeid. Men no er arbeidet avslutta, og me har fått gode lokale. Det er me veldig glade for, seier rektor, som gler seg over at elevane no har meir rom å boltra seg på.
Engasjerte foreldre er også eit viktig stikkord på denne skulen. Dei er flinke til å stilla opp på dugnad og har mellom anna gjort ein del arbeid på uteområdet til skulen.