Meland golf: Ei bane du hugsar

Golfbana i Meland har rykte på seg for å vera både vakker, spennande og full av utfordringar.

– Har man først prøvd den en gang vil man gjerne prøve på nytt.  I alle fall når den største skuffelsen har lagt seg etter å ha bitt i gresset for det som gjerne kalles Monsterbanen, skriv Meland golfklubb på sine nettsider.

Fleire kjente namn har funne vegen til Meland for å bryna seg på denne bana, deriblant ein tidlegare amerikansk president. Bill Clinton besøkte bana i 2007 og omtalte bana som ei av dei flottaste og vanskelegaste banene som finst.

– Mange kjem langvegsfrå for å spela her. No i juli har me hatt ein god del cruiseturistar her. Folk kjem heilt frå Kina. Dei er gjerne med på cruise til Bergen. Medan båten ligg til kai der, tek dei drosje ut hit for å spela. Vanlegvis er aktiviteten på bana veldig vêravhengig, men i juli månad er det fullt kjør nesten uansett vêr, seier administrativ leiar Tone Skjeie. Bana trekkjer også mykje folk frå Bergensområdet.

– På fine dagar kjem gjerne folk hit med heile familien sin, og me får høyra at kone og born kosar seg på badeplassen på Fløksand mens far spelar, golf seier Skjeie og ler.
Golfbana i Meland er ei skogsbane med 18 hol og gode fasilitetar.

– Sjølv om bana er kjent for å vera vanskeleg, så opplever me at folk trivest her uansett alder og nivå. Det skuldast nok naturen og stemninga på bana. Sjølv om bana eigentleg er full av folk, føler spelarane at dei har god plass, og her er gode treningsforhold. Me har både chipping og putting-green og Drivingrange med 34 båsar, får Strilen vita.

I 2009 vart det arrangert NM her, og det er også arrangert ei rekkje mindre turneringar her. Skulle du verta svolten under eit besøk på golfbana er det også muleg å få seg ein matbit.

Golfbana har nemleg ein eigen italiensk restaurant som er open laurdag og søndag i sesongen. Dei driv også med catering, og når ikkje restauranten er open er det vanlegvis muleg å få kjøpt seg pølse, is eller noko å drikka i kiosken.