Midt i senteret

– Ungdomskontakten Salto er truleg ein av dei mest økonomisk fornuftige måtane å driva førebygging på.

Undervisningssjef Arne Klyve ved Bergensklinikkene har kome med denne vurderinga av kor viktig Ungdomskontakten Salto er i det førebyggande ungdomsarbeidet.

Lensmann Einar Vatne meiner at Salto er det viktigaste ungdomstilbodet i Nordhordland. Det kom fram på ei nyleg evaluering.

– Ikkje berre lensmannen, men og dei andre fagmiljøa som står bak, uttaler seg positivt. Dette er eit tilbod som me i Knarvik Senter er stolte over og glade for å vera med på, seier senterleiar Åge Torsvik.

Salto er kort fortald ein treffstad for ungdom mellom 13-20 år. Den vanlege og faste opningstida er frå skuleslutt til kring 15.30.

Målet er mellom anna å stoppa unge som er i startfasen av å skulka skulen og byrja med nasking og eksperimentering med rus, men Salto er også eit tilbod til ungdommar som ikkje er i noko «faresone».

I styringsgruppa finn ein videregåande skule, Knarvik Senter, kommunane, politi og kyrkja.

– Frå senteret si side har me merka ei veldig positiv utvikling, gjennom nedgang i hærverk og unge som ikkje har noko å ta seg til. Det som er ekstra positivt, er at tilbodet ikkje berre omfattar den konkrete opningstida. Dei tilsette driv også oppsøkjande arbeid, til dømes på ungdomsskulen, seier senterleiar Torsvik.

Sjukepleiar Ingrid Bekkenes er leiar for tilbodet og har med seg sosionomane Marit Midtgård og Mariann Urdal Henanger i den faste staben. I tillegg er det inne anna fagpersonell blant anna frå Masfjorden og Modalen. I alt er bemanninga på 1,9 årsverk.

– Salto er ein stad der alle unge i alderen 13−20 år kan koma innom og prata med kvarandre og oss vaksne. Dei kan til dømes koma innom når dei ventar på bussen. For dei som vil, har me også fire PC−ar der dei til dømes kan bruka spel som Playstation, seier Ingrid Bekkenes.