Musikk i kongelege omgjevnader

Festen for kongestatuen vart til ein musikkfestival som nesten får heile Skjerjehamn til å søkka i havet.

Det starta altså med festen for Knut Steen sin statue over kong Olav den 5., ein statue som vart avduka sommaren 2007. Året etter var tradisjonen i boks, og sidan det har Utkantfestivalen auka på i omfang.

Her har ein fått høyra alt frå Nora Brockstedt, Nils Petter Molvær, Jan Eggum og Lars Vaular, til Veronica Maggio, Ole Paus og DeLillos. I tillegg til mange andre store og mindre store norske musikknamn.

Så mange tusen menneske er det på den vesle holmen der festivalen vert arrangert, at ein av og til kan lura på om den snart går under. Etter at øyane i Gulen i 2010 vart landfaste med brua over Brandangersundet, har pågangen for å vera med berre vorte endå større.

– Det er vel kombinasjonen av godt musikkprogram og det at Skjerjehamn er ei litt eksotisk perle, som gjer festivalen så populær, seier festivalsjef Viggo Randal.

– Utkant skjer litt vekke frå folk, samstundes som det er nære nok til at ein kan reisa hit.

Festivalarrangørane må ta seg litt betre av gjestene enn kva festivalar i meir sentrale strok, i Skjerjehamn vert det ordna både båtskyss, hotellpakkar og teltplassar.

Rett nok har øyene i Gulen vorte litt meir «sentrale» med den nye brua, men å vera på festival i Skjerjehamn er framleis noko heilt spesielt.

Siste helga i juli i år samla Utkantfestivalen 6.500 menneske i Skjerjehamn. Utkant 2012, den sjette festivalen, går frå 26. til 29. juli.

– Tidleg i november kjem me med dei første namna på dei som skal spela i 2012, seier festivalsjef Randal.