Over Nøttveitveten - Der dei spreke går

Kommune: Radøy
Tid: Kjem an på kor ein startar, men om lag tre kvarter over alle tre visst ein startar ved Solendfjellet.
Rute: Frå bilvegen ved Solendfjellet, frå Morken, Lid eller Nøttveit (bratt).
Høgde: Morkefjellet 217 meter, Nøttveitveten 204 meter.
Eigna for: Alle. Barnehagen klarer det fint.

Toppen av Nøttveitveten er truleg det best besøkte turmålet i Radøy, skriv vedkomande som meiner Veten fortener tittelen Nordhordlands beste tursti.

Og hit kan ein gå direkte, eller over dei andre fjella.
 
Statustoppen
Veten har fått status som toppen dei spreke går på.

I alle fall seier ein at går du på Veten, så er du sprek, får Strilen fortalt.

Men turen kan også gåast av dei yngste, det har barnehagen testa ut.

Tusenårsstaden
Frå toppen av Nøttveitveten har ein god utsikt i alle retningar, og på fine dagar kan ein sjå alt frå snødekte fjelltoppar til oljeplattformar i Nordsjøen og Holmengrå.

Om kvelden kan ein sjå sola gå ned i havet i Vest. Ei flott skode!

Det er ikkje utan grunn at Nøttveitveten og området kring vart vald til tusenårsstad i Radøy kommune for elleve år sidan.

Kulturlandskap
Området er eit flott kulturlandskap som vert beita og halde vedlike, samstundes som det er tilrettelagt for ferdsel med grinder, gjerdeklyv og merka stiar.

Går ein frå toppen av Lifjellet, er første delen tilgjengeleg for menneske med nedsett funksjonsevne.

Det er grusveg eit lite stykke, og i enden av grusvegen er det sett ut benkar. Her har ein flott utsikt over Manger og øyene i vest.

For dei som ikkje er kjende, kan det vera nyttig å vita at Lifjellet og Solendfjellet er same fjellet, men vert kalla Solendfjellet på Manger-sida og Lifjellet på andre sida.

Hytter på toppane
På Veten og Morkefjellet er det sett opp to små «hytter» der ein kan skriva seg i boka, søkja ly for vind og regn, eller berre nyta utsikta.

Hyttene er sette opp av høvesvis Manger bygdelag og Manger idrettslag. Og kvar Kristi Himmelfartsdag arrangerer idrettslaget Trefjellstur.