På veg ut i verda med eigen musikk

• Anne Hvidsten • Alder: Hehe… 29 for alltid. • Bur: I Alversund • Type artist: skriv og syng eigne ­tekstar • Sjanger: Pop/vise/country

Ho fekk napp hjå fleire, og etter ei tid dukka også debutplata hennar opp i butikkane. Plata med tittelen «Need to know» selde over all forventning.

– Eg fekk ein låt på hitlistene. Den låg på toppen i lengre tid, saman med musikk av Britney Spears. Det var litt rart og veldig artig, seier Anne.

Ho skriv alle tekstane sine sjølv. Det har ho gjort sidan ho begynte å spela gitar i 11-12 årsalderen. 

– Musikken betyr veldig mykje for meg, og eg har ein draum om å få musikken min ut i verda, seier Anne, som alt har lukkast ganske bra med det.Ho har sunge i ein norsk Grand Prix-finale og ho har halde mange konsertar i Noreg og nokre i Danmark.

– Eg har gjeve ut to plater no. Num­mer to gav eg ut på eige selskap. Det var ei heilt anna oppleving enn å gje ut den første. Når ein gjev ut på eige selskap har ein kontroll med alt heile vegen, og ein lærer utruleg mykje undervegs. Du lærer utruleg mykje under ein slik prosess, og også den plata slede bra, seier Anne, som heile tida har jobba målretta for å etablera seg som artist.

– Eg hadde ein liten pause frå musikken då eg vart mamma, då nytta eg også sjansen til å ta litt meir utdanning, men i den seinare tid har eg satsa vidare på musikken, fortel Anne, som også ha skrive ein song som hylle til kommunen der ho vaks opp. Austr­heimsongen er spelt inn på ei plate som folk kan kjøpa på rådhuset og er framført i ulike lokale samanhengar.

– Eg har ikkje profilert den på nokon måte, men den er vorte ganske populær og er faktisk spelt på radio ganske mange gonger, får Strilen vita.

For få dagar sidan gjorde Anne også ferdig si tredje plate.

– Den aller beste eg har laga, meiner ho. Det er førebels ikkje klart når plata vert å få kjøpt, men Anne har stor tru på at den vil gjera det bra.– Eg føler at eg har utvikla meg ganske mykje som artist sidan eg gav ut den første plata og det på ein god måte. Og tekstane på denne plata er sterkare og etter mi meining betre enn mykje av det eg har gitt ut før.

– Og kva har du laga musikk om denne gongen?

– Plata ber veldig preg av at mannen min var i krigen i fjor. Han var på oppdrag i utlandet og mange av tekstane kan knytast opp til det. Men tekstane mine handlar i grunn om mange forskjellige ting. Mykje av inspirasjonen får eg når eg er ute i naturen, eller berre gjer eit vanleg ærend på butikken. Det kan vera så mange ting som inspirerer meg. Heilt vanlege ting som ein person eg ser på gata eller ei kjensle. Det kan vera alt eigentleg, seier Anne, som synest det er stas at nokon har nominert henne til tittelen Nordhordlands beste.

– Eg føler at eg har funne roen i Nordhordland no. Her har eg stifta familie og her har eg lyst til å bu i framtida. Det er trygg og god base og det er godt å ha når ein vil ut i verda med musikken, seier Anne.