Proffe og amatørar i fint samspel

Håkonarspelet på Seim såg dagen lys i 1997. Det var ein del av dei første kystsogevekene. Det er forfattaren Johannes Heggland frå Tysnes som har skrive fire skodespel som handlar kongen Håkon den gode, som levde i første halvdel av 900-talet. Dei fire spela er framførde på Fitjar, Håkonshella, Seim og Flolid i Gulen.

Spelet på Seim heiter «Håkonvarde» og handlar mest om kongen sin kamp for å kristna Noreg. Handling går delvis føre segi kongsgarden på Seim, ved kong Adalstein sitt hoff i Engeland og diverse stader i Noreg, særleg i Trøndelag.

Spelet er eit samspel mellom profesjonelle skodespelarar og amatørar, og har engasjert mange i Seimsbygda og vidare med. Spelet er basert på ein stor dugnadsinnsats, både på og bak scena. Ei gruppe frå Eikanger-Bjørsvik har framført musikken, og songarar, særleg frå Seim Songkor, har utgjort koret. Den første musikken var laga av Jostein Stalheim, medan musikken til årets spel var laga av Reid Gilje.

Paul-Ottar Haga og Agnete Håland hadde rollene som den vaksne Håkon og mor hans Tora Mostrastong i dei første spela, medan seinare har både Bjørn Wilberg Andersen og Arvid Ones tolka kongerolla.

Mange lokale krefter, som Knut Magne Molvik, Kjersti Wiik, Johannes Rydland og Leif Egil Vatnøy har opp gjennom åra hatt viktige rollar i spelet, og i årets oppsetjing hadde Preben Hodneland rolla som skalden Øivind Skaldaspille.

Etter ein pause på åtte år vart spelet teke opp att i år, med Leif Egil Vatnøy som regissør, mykje nye scenografi og ei imponerande lyssetjing.

Etter planen skal spelet framførast fleire gonger, men neppe på Håkonshaugen, sidan Riksantikvaren set restriksjonar på bruken av haugen. Ein håpar på ein fast spelstad ein annan stad i Seimsbygda.

Spelet har kvar gong vorte spela tre til fire gonger, og siste gong med om lag 2.800 til­skodarar.