Samlar ungdom frå heile regionen

Link er eit gratis ungdomstilbod kvar fredag i Alvermarka. Det er ungdomsarbeidet til Nordhordland Bibelsenter, men også ikkje-kristne born og unge brukar tilbodet. Gruppene link 5+ og 8+ deler på fredagane, slik at unge opp til 5. klasse og opp og 8. klasse samlast annankvar fredag. Samlingane startar med andakt, så spelar ungdomsbandet live, kafeen opnar og ein kan leika eller prata alt etter kva ein vil.

– Fredagskveldane for dei i 5. klasse og oppover samlar ofte over hundre ungdommar frå heile distriktet. Også heilt frå Åsane og Austrheim, skriv Jan Helge Hindenes i si nominasjonsgrunngjeving. Han er nøgd far til to som brukar tilbodet.

– Her er god og billeg mat, musikk, spel, miljø, aktivitetar og andakt for dei som ønskjer det. Alle vaksne stiller på dugnad, fredag etter fredag, skriv han.

Når ungdommane frå 8. klasse og oppover samlast, kjem det regelmessig 30-40 ungdommar.

Torill Skarsvåg prisar også tilbodet.

– Det er fint å kunna senda borna sine til ein trygg stad på fredagskveldane. Mange ungdommar er engasjerte som aktivitetsleiarar, dei spelar i band eller står i kiosken, og det er mange vaksne til stades. Nokre har vore der nesten kvar fredag i fleire år. Det er prisverdig, skriv ho i sin nominasjonsepost.

Då Link starta, var det ti ungdommar som møtte opp. Men det har auka på, og dei har dei hatt opptil 150 tilstades på samlingar.

– No har me komme til det punktet me ville, nemleg at me trenar ungdommen sjølve til å verta leiarar og til å ta ansvar. Det kjem ungdom frå heile distriktet og frå fleire menigheter, slik at det har vorte eit samlingspunkt der ungdom kan møtast og utvikla seg, seier Terje Tofting, dagleg leiar ved Nordhordland Bibelsenter.