Samlar ungdom i kyrkja kvar fredag

Det starta opp som ein konfirmantklubb i 1989 og så bala det på seg. I dag samlar ungdomsklubben i Ostereidet kyrkje 50-70 ungdommar kvar fredag.

– Me brukar å spøka med at me har fått ein ny vekedag. Den heiter fredagskafeen, flirar Odd Molvik. Han har vore med å driva ungdomstilbodet sidan dag ein, og stortrivst med det.

– Før hadde me det annankvar fredag, men så vart det så populært at me bestemte oss for å ha det kvar fredag. No har me 20 leiarar. Me er ein gjeng vaksne, og så har me lært opp ein del av dei eldste ungdommane, seier han.

Ungdomane heldt til i kjellaren på kyrkja, og tilbodet har ein kristen profil.

– Det betyr at me har andakt kvar gong. Men det er valfritt for ungdomane å delta på den. Me vil at fredagskafeen skal vera ein trygg og sosial møteplass for ungdom, og det føler me at me har lukkast med. Ungdommane kjem hit for å prata, spela spel og slappa av. Me har biljard, airhockey og mange brettspel, og så har me kiosk med pizza og snop, seier Molvik. Når du les denne teksten her har fredagskafeen akkurat vore på tur til Frekhaug.

– Me har gjort det før, med stor suksess, så det gjentek me gjerne. Me leiger rett og slett idrettshallen på Nordhordland folkehøgskule, og er der ein heil kveld. Me kjører ungdommane med buss tur-retur Ostereidet og har det kjempegøy.

Drifta av fredagskafeen skjer på frivillig basis, og foreldre i bygda stiller også frivillig opp som Natteravnar. Natteravnane går kvar fredagskveld i området rundt kyrkja og idrettsanlegget, for å sikra at alt går fint for seg.

– Dei gjer ein fantastisk fin innsats for bygda. Fredagsklubben er eit rusfritt arrangement og eg trur det betyr mykje for bygda at me har eit slikt tilbod til ungdommen, seier Molvik. Tilbodet er for elevar i ungdomsskulen og vidaregåande skule.