Skulen som ­engasjerer bygda

•    Eldste delen opna i 1934, dagens hovudbygg reist i 1975
•    Elevar: 67
•    Tilsette: 14
•    Rektor: Arne Kvamme
•    Skuletype: Barneskule, firdelt skule. Undervisninga delt etter dei timeressursane skulen får, per i dag er delinga 1.+2., 3.+4., 5., 6.+7.

– Heile bygda her bryr seg om skulen, den er viktig for dei. Og foreldra bryr seg ikkje berre om eigne born, men også heile flokken rundt.
I ein av nominasjonane som skulen har fått, vert nettopp ulike bygdesamlingar dregne fram som eit godt argument for å kåra Skodvin til Nordhordlands beste skule.
– Det er litt artig at du spør om kva som er bra med Skodvin, for nettopp i dag var det nokre elevar som etter ein musikktime kom med spørsmål om det var mogleg å gå her eitt år til, seier Kvamme.
Akkurat å gå sjuande oppatt kan ikkje rektoren ordna.
– Eg måtte skuffa dei på det, men me var samde om at dei må ha det kjekt på skulen så lenge dei går her.
Rektoren viser til at elevane i ulike undersøkingar svarer at det er eit godt miljø på skulen, og personalet melder om oversiktlege tilhøve.
– Ulike fenomen ein kjenner frå andre stader, som skulking og manglande vilje til å gjera skulearbeid, er stort sett ukjent for oss her, seier han.
Med ein liten skule meiner Kvamme det er lettare å ha oversikt og sjå den enkelte eleven.
– Eg synest me har jobba bra med grunnleggjande opplæring som lesing og skriving, legg han til.
Særleg dreg rektoren fram samarbeidet med ein lokal gardbrukar, eit prosjektarbeid som no er ein fast del av skulekvardagen for mellomtrinnet. Der er elevane ute på garden og deltek i dyrking av grønnsaker og anna gardsarbeid, og grønsakene vert mellom anna nytta til ulike matvarer som dei sel under Bondens Marknad i Bergen.
– Gjennom dette arbeidet får me formidla vesentlege haldningar og kunnskap om korleis ein sjølv kan bidra til å skaffa seg mat. Ved å dyrka maten her i nærmiljøet viser me også korleis ein kan bruka kulturlandskapet rundt oss, seier Arne Kvamme.