Søstre med ambisjonar

• Ingelin Reigstad Norheim og Hildegunn Garnes Reigstad • Alder: Tvillingar, 27 år • Bur: i Oslo • Type artist: syng og spelar • Sjanger: Singer-songwriter. Poplåter med innslag av litt forskjellig. 

I dag er dei to kjent som duoen Garness og kan sjå tilbake på hundrevis av oppdrag på ulike scener, spennande år i musikkbransjen og to vellukka plateutgjevingar. Debutalbumet deira kom i 2008 og fekk namnet The Good or Better Side of Things. Sleppekonserten var lagt til Soria Moria Teateret i Oslo der det vart fullt hus, kan ein lesa på Garness si nettside.

– No for tida går det mest i låtskriving for oss, kan Ingelin fortelja. Begge søstrene er i dag busett i Oslo og livnærer seg på musikken.

– I tillegg til eigne prosjekt er me med som musikarar for andre artistar. Me er mellom anna mykje med Sigvard Dagsland og speler, seier Ingelin. 

Dei to søstrene meistrar mange instrument og det at dei sjølv speler sine eigne songar er viktig for dei.

– Eg speler vanlegvis forskjellige typar gitar og gjerne litt mandolin, medan Hildegunn er god på mange typar «perke-ting», altså perkusjon, harpe og ei rekkje slike instrument som er litt uvanlege og som publikum brukar å vera litt nygjerrige på. Det set også sitt preg på lydbildet vårt.

Musikken og tekstane sine skriv jentene sjølv og tekstane har gjerne det til felles at dei er litt ettertenksame. 

– Me skriv gjerne tekstar om ulike epokar i livet, om eigne erfaringar og om allmenne ting som kjærleik og vennskap og slikt.

Som vaksne har jentene to cdar på cven. I tillegg til den som tidlegare er nemnt her, har dei gjeve ut ei juleplate.

– Den fekk me ein del merksemd for, og songar frå den plata er spelt litt rundt om kring, men sjølv om ein har drive med musikk omtrent heile livet er me veldig klar over at det tek litt tid å etablera seg skikkeleg i musikkbransjen.

Ein må vera førebudd på at det kan ta litt tid, og me har inga hast. Me tek den tida me treng med å gjera klar vårt neste album. Det er ikkje noko stress og i mellomtida har me det veldig kjekt med ulike oppdrag for andre, seier Ingelin.

Og når du les dette har søstrene nyleg vore deltatt på konsert med VG-lista på Rådhusplassen i Oslo.

– Elvira Nikolaisen skal synga og har invitert med seg nokre vener til å syngja saman med henne. Det vert nok veldig artig, seier Ingelin til Strilen før konserten.