Stor jubel på liten skule

– 490 stemmer, var eit av tipsa frå blide elevar.

– Avstemminga viste til slutt 495 stemmer i Strilen si lesar-avstem­ming, opplyste redak­tør­en i Strilen. Dermed hadde skulen vunne ein klar siger over neste skule, som hadde 140 stemmer.

Diplom, roser, ballar og snop
Redaktøren kom til skulen med diplom, blomar og «ekstrapremie» både til elevar og lærarar. Turen til Kløvheim tok han også for kring ein månad sidan, då skulekorpset i bygda kneip tittelen «Beste lag/orga­nisa­sjon».

Elevrådsleiar Vegard Eidsheim Kvingedal tok imot diplom som bevis på kåringa til «Beste skule». Bukett med roser gjekk til fungerande rektor Malin Møvik då rektor Turid Sporsheim Tvedt var borte på kurs.

Mest jubel vart det for pre­mi­en til elevane – to nye og gode fotballar. Dei vart kjapt tatt i bruk i ballbingen. Redaktøren hadde og med seg noko godt til lærarane.

Stor mobilisering
«På Kløvheim skule opplevde eg eit heilt anna miljø enn eg gjorde på storskulen», skriv ein tid­legare elev som hadde nominert vinnar-skulen.

Skulen har berre 38 elevar, men det ser ikkje ut til å ha gått ut over miljøet. Som kjend er det vedtatt nedlegging, og at Kløvheim og Eikanger får ny felles skule.

Vedtaket om nedlegging har utan tvil ført til at mange i bygda har stemt og mobilisert for korpset og skulen.  Før dei to siste titlane gjekk til Kløvheim, vann Fedje ved Pernillekaféen og Bøvågen ved Bunnpris, stemt fram som «Beste serveringsstad» og «Beste butikk».

Må mobilisera
Kåringa viser uansett at dei som vil heilt til topps kvar månad, må mobilisera kraftig. Stem­minga skjer på nettsida til Strilen.

Der kontrollerer leveran­dør­en av nettsidene at kvar datamaskin/PC berre får bruka stem­­meretten ein gong.

Seinare i mai startar stem­minga på «Beste tursti», som vert kåra tidleg i juni.

«Beste skule» kåra gjennom avstemming på Strilen si heimeside og telefonstemmer:

•    Kløvheim skule - 495
•    Fedje skule - 140
•    Festo - 137
•    Rossland skule - 109
•    Skodvin skule - 79
•    Alversund skule - 74
•    Nordhordland kristne Grunnskule - 69
•    Knarvik ungdomsskule - 60