Strilige karar

• Tor Halvor Halvorsen og Preben Hodneland • Alder: 36 og 27 år • Frå: Begge kjem frå Lindås. • Type artist: Skodespelar/revy

Lindås ungdomslag har i ei årrekkje levert oppsetningar og revyar av høg kvalitet og Preben og Tor Halvor har absolutt medverka til det. Men karane har vore med på mykje meir enn det.

Tor Halvor har vore med i førestillingar som «Jan Herwitz» og «Hakkebakkeskogen» ved Den Nationale Scene i Bergen. Han har også spelt i «Hvem har tatt min venstre sko» og «Rødt lys» produsert av Vestlandske Teatersenter og vore med i suksessførestillinga «Kaptein Knurr» i Gamle Bergen.

Preben har førestillingar som «Rent», «Miss Saigon» og «Which Which» og Rv555» av Vestlandske Teatersenter på rullebladet. Han har også studert song ved Complete Vocal Institute i København. 

No er dei to også i ferd med å gå «duo» under namnet «Strilige karar». Og det er på høg tid, skal ein tru ein del av dei som tidlegare har site i salen og sett desse to på same scene. Karane jobbar fram mot premiere i september og gler seg veldig til å visa det dei har jobba.

Stykket dei skal visa heiter «Stones in his pockets» og går føre seg i småbyen County Kerry, der ein får møta to karakterar som begge har fått jobb som statistar i ein stor Hollywood-produksjon. I stykket møter ein også ei rekkje andre karakterar og dei to skal ha i alt femten ulike roller.  

– Det er full fart. Akkurat no jobbar me mest med å læra oss tekstane. Du kan vel seia at det tek litt tid når to personar skal læra seg tekstar til eit heilt stykke, men det går veldig bra. Me har det utruleg artig, seier Tor Halvor. 

Han kan fortelja om ein kjekk komedie, med nokre alvorlege undertonar. Planen er at det skal visast på Lindås, i Austrheim og kanskje også i Radøy. Samtidig som dei jobbar med dette har dei to også ei rekkje prosjekt kvar for seg som krev mykje fokus i månadane framover.

Denne veka har Preben vore i Oslo der han tek opptaksprøven til teater­høgskulen. Han skal også vera med på Håkonarspelet på Seim i sommar, medan Tor Halvor også denne som­maren vert å sjå i Kaptein Knurr i Gamle Bergen.

– Det er utruleg mykje som skjer framover no. Det er litt skummelt og veldig artig, og me håpar mange har lyst til å koma å sjå på oss, melder karane.