Til taket av ­Masfjorden

Lokale eldsjeler og Risnes IL drog sommaren 2009 i gang motbakkeløpet Sleirsfjellet opp, som tek deg frå grendahuset og opp til toppen av – ja nettopp Sleirsfjellet.

Varden på toppen er 543 meter over havet, og det gjev ei stigning på kring 500 meter i løpet av den 3,4 kilometer lange løypa. Kanskje ikkje det brattaste motbakkeløpet på Vestlandet, men bratt nok til å testa både lår- og leggmusklar.

Deltakartalet har gått opp­over for kvart år løpet har vorte arrangert, med nær 140 i 2009, kring 200 i 2010, og 260 no i 2011. Sjølvsagt er det mange masfjordingar å sjå mellom deltakarane, men også strilar frå andre delar av regionen er med på å gjera dagen til ein trimfest.

– Den største auken har vore for dei utan tid. I år hadde me familiar frå heile Masfjorden, og det er gledeleg at me kan delta på ting på tvers av bygdene, seier Tove Kristin Sleire Tistel, eldsjel for løpet og medarrangør sidan starten.

– Målet er å fremja lysta til å driva aktivitet og halda seg i form. Me oppfordrar folk til å konkurrera med seg sjølv, det er den beste måten å konkurrera på.

Sleirsfjellet Opp har felles oppvarming før start, muntre heiarop frå løypevaktene, og kjærkomen drikke når ein endeleg er på toppen. 

I 2012 er løpet fastsett til laurdag 9. juni.
– Løpet har skapt engasjement i bygda, og vist at me kan få ting til her også, seier Tove Kristin Sleire Tistel.

– Me har ei fast gruppe som står for organiseringa, med god hjelp frå bygdefolk, Risnes IL og kommunen.