Tjorehagen med over 300 rododendronartar

Då Olav Tjore bygde seg hus i utmarka på Tjore, var det ingen bilveg der og materialane vart frakta opp frå sjøen med løypestreng. I dag ligg hagen hans sentralt plassert like ved Fylkesveg 565, og mange finn vegen hit for å oppleva blomeprakt og hageidyll.

– Besøket er jamt bra. Både lokale, turistar med bubil og bussar med grupper kjem for å sjå på hagen. Hagen brukar å opna for sesongen 1. mai og då går det ikkje mange vekene før rododendronane står i full blomst, seier Ketil Tjore.

Han er nevø til Olav og leiar i foreininga Tjorehagens venner.

Olav døydde i 1998, men hagen og minna om han lever vidare og gleder stadig nye menneske.

Etter Olav sin død har hagen vorte drive av stiftinga Tjorehagen med støtte frå venneforeininga.

I fjor kunne hagen feira 50 års jubileum. Olav bygde opp hagen gradvis og den fekk tidleg form som eit parkanlegg. Då vegen kom på 1970-talet begynte det å koma tilreisande for å kjøpa jordbær av Olav, og dei tok seg gjerne også ein rundtur i hagen. Og hagen vaks og vaks.

– Olav var veldig glad i hagen sin og brukte mykje tid på den. Den store eika som står i hagen, fann han på andre sida av fjorden og frakta heim med båt. Han grov ut eit damanlegg i hagen for hand, og sleit ut mange spadar undervegs. Han fekk kjøpa ein del grunn av naboane slik at hagen kunne veksa, og etter hans død har stiftinga halde fram med å utvikla hagen. No er det over 300 ulike rododendronartar her, kan Ketil Tjore fortelja.

I tillegg til mange flotte rododendronartar husar hagen ei flott steinbru, kafe og ei utstilling der du kan læra meir om hagen og Olav Tjore.

I 2011 arrangerte Tjorehagens venner også eit minneløp i området. Løping var nemleg også ein stor lidenskap for Tjore, og planen er at minneløpet skal verta ein  tradisjon.