To veker med ­masse­mønstring

– Alle lag i kommunen stiller opp, saman med kommunen, frivilligsentral  og kyrkja. Dette har gjeve eit godt mangfald og medverka til fullt hus på mange arrangement.

Det er Helge Dyrkolbotn sine viktigaste arrangement for å stemma på Kulturdagane i Austrheim som «Beste arrangement» i Nordhordland.

Dei første ti åra vart dagane arrangert kvart år, sidan 2002 annakvart år.

Arrangementet går over to veker, og har tre «bein» å stå på:
– Lokale krefter og aktørar
– Innleigde eksterne aktørar, gjerne kalla kjendisar.

Gjennom åra har fleire faste arrangement skapt stort lokalt engasjement. Her kan nemnast bygdekveld på Kaland, der gymsalen på skulen alltid har vore stappfull.

Som regel har også kommunen sin kulturpris vorte delt ut på dette arrangementet.

«Kom og syng med 1.-4. klasse» (biletet) er eit anna fast innslag, som Årås skule står bak. Austrheim samfunnshus er alltid smikk fullt under desse arrangementa, og elevane har ein svært høg kvalitet på det som vert framført, skriv Dyrkolbotn.

Av andre tilsvarande arrangement kan nemnast familiedag i Mongstadhallen og salsutstilling i Førlandshuset. For ungdom står konsertar, dataparty, filmfestivalar og open hall på plakaten. På nokre av dagane har ein og tjuvstarta med boklanseringar.

Blant kjende namn utanfrå som har stått på scena under kulturdagane i Austrheim, kan nemnast Lill Lindfors, Arja Saijonmaa og Multicyde, Dagfinn Lyngbø og Morten Abel.