Ungdom som kan redda liv

Røde Kors Ungdom Nordhordland er eit tilbod til unge menneske mellom 13 og 30 år. Den ferske ungdomsgruppa lærar å redda liv, nyt naturen og har som mål å inkludera alle som ønskjer det i eit sosialt fellesskap. Kim Espen Karlsen er «ein stolt Røde Kors-frivillig» og ein av fleire som har nominert dei til Nordhordlands beste ungdomstilbod.

– Me lærer mykje om livsviktig førstehjelp, behandling av skadar som brot, blødingar og hjartestans. Me lærer å tenna bål i skog og mark, reglar i krig og om rettferd, inkludering og likeverd for menneske i heile verda, seier Karlsen.

– Ofte reiser me på sosiale og koselege turar til Røde Kors-hytta, som ligg i nærleiken av Romar­heim. Der kosar me oss med godteri, brettspel, film, står på ski, kjører snøscooter og har det alt i alt kjempekjekt, seier han.

Leiar for Røde Kors ungdom i Nordhordland er Stig Krossøy Nordvik.
– Folk forventar å halda på med førstehjelp og friluftsliv hjå oss, og det får dei, men me har og mange andre kurs og aktivitetar for ungdom, seier Nordvik.

Ungdomsgruppa har blant anna to instruktørar som underviser i korrekt bruk av kondom, og gir kunnskap om dei mest vanlege kjønnssjukdommane. Dei er òg med på kampanjar og prosjekt gjennom landsforeininga, som til dømes kampanje mot barnesoldatar. Det kjem rundt ti ungdommar til kvar samling, men Nordvik legg vekt på at dei har rom for alle som har lyst å komme.

– Me er enno ei fersk gruppe, og ønskjer alle velkomne, enten du er herifrå, har flytta hit frå Bodø eller har komme til regionen som flyktning. Me har eit breitt fagfelt med mange ulike aktivitetar og kurs for dei ulike aldersgruppene, seier ungdomsleiaren.

– Om ein ikkje veit kva ein har lyst til, er det berre til å møta opp, så finn me noko som passer.