Vardetangen – noregs vestlegaste fastlandspunkt

Kommune: Austrheim
Tid: ca. 30 minutt
Rute: To alternativ. Enten frå moloen på Fonnes eller frå snøggbåtkaien på Vardetangen.
Høgde over havet: berre nokre få meter.
Eigna for: Alle. Lettgått sti.

Dette er også kommunen som kan skryta av Noregs vestlegaste fastlandspunkt.

Det finn du på Vardetangen nærmare bestemt på 4 grader 56' 58" austleg leng.

– Me ligg faktisk lenger vest enn Vestkapp på Stadtlandet, sjølv om dei hevdar noko anna, flirer Helge Dyrkolbotn i Austrheim kommune.

Han kan fortelja at turløypene til Vestkapp er mykje brukte, og at grunneigarar i området nyleg har gjort ein fin jobb med å gjera løypene endå litt betre.

– I 2010 var det nesten 4000 som skreiv seg inn i turboka på Vardetangen, kan han fortelja.

Og austrheimingane er flinke til å utnytta ressursane i nærmiljøet til rekreasjon og sport.

Havsport og kystkultur er eit satsingsområde, og tek du turen til Vardetangen kjem du tett på sjøen.

Det er to ruter å velja mellom. Begge er lettgådde og går i flatt terreng.

Ruta frå snøggbåtkaien på Vardetangen er kortaste alternativ, og her er det godt tilrettelagt med benkar.

Ved snøggbåtkaien kan du sjå ein nyrestaurert jordkjellar og stien går gjennom lyngheiane, som er så typisk for kystlandskapet her.

Undervegs kan du også sjå ut i havet på tankbåtane som ligg og ventar på å få gå til kai på Mongstad.

Og ingen treng vera i tvil om når dei har kome fram til det vestlegaste punktet på fastlandet.

Det er tydeleg markert med varde og skilt.

Det er også laga ein eigen pins for Vardetangen, for dette er ein attraksjon som vert brukt aktivt i marknadsføringa til kommunen.

– Alle som bur i Nordhordland bør gå denne turen ein eller annan gong.

Lenger vest kjem du ikkje på fastlandet i Noreg, og det er litt stas, meiner Dyrkolbotn.