Vil vera tett på det lokale

•    Fødd: 1976
•    Bur: I Knarvik
•    Partitilknyting: Frp

Bjarte Vatnøy melde seg inn i Fremskrittspartiet i år 2000.

– Eg begynte å engasjera meg fordi eg var mot bompengar. Så oppdaga eg at det var også var mange andre gode saker eg ville jobba for, seier Bjarte til Strilen. Han er no klar for sin tredje periode i kommunestyret.

– Eg synest det har vore veldig spennande å sitja i kommunestyret, og veldig kjekt å vera varaordførar i siste periode. Eg har fått vore med på mange interessante saker. Lindås kommune var jo på Robek-lista over kommunar, og økonomien var dårleg. Me har måtta tatt ein del tøffe val, men eg føler også at me har fått til mykje bra. Det har vore spennande å jobba med kommuneøkonomien og framtidsplanar. Tilbod til dei unge og dei eldre opptek meg. Av saker eg hugsar spesielt godt, så har me hatt ein del spennande namnesaker. Altså stadnamn. Det er slikt som engasjerer folk veldig, og ein del vegsaker, og så har du sjølvsagt skulesaka. Den har vore viktig og vanskeleg.

– Ja, ditt parti har jo stemt for skulenedlegging. Korleis har det vore å skulla forsvara eit slikt synspunkt?

– Det er ikkje så lett, men ein må våga å stå for det ein meiner. Som lokalpolitikar har eg møtt ein del som meiner at eg burde meint noko anna om saker og ting, og ein del som er glad for at eg meiner det eg meiner. Og slik er det jo, men når du sit i kommunestyret for eit parti, må du jobba for dei sakene partiet meiner er viktige, og eg må seia at eg føler at eg er kome i riktig parti. Eg er veldig einig med Frp sin politikk og når ein må ta vanskelege val, er det viktig å føla at dette er noko det er brei einigheit om i partiet, seier Vatnøy.

Han har hatt ein del verv både i Lindås Frp, Hordaland Frp og utsending i KOMPOL- eit kommunepolitisk utval. Privat har han også engasjert seg litt for idretten.

– Då eg var yngre, spelte eg ein del fotball og som student var eg mellom anna med å starta ein fotballklubb for utflytta strilar. Den fekk namnet SK Mann og lever framleis i Bergen, og eg har engasjert meg i Regncon ein årleg spelfestival i Bergen, men i dei seinare år er det familie og politikk som har tatt mesteparten av fritida mi, seier Bjarte. Medan mange politikarar ønskjer seg til Stortinget, er han klar på at det er lokalpolitikken som er viktig for han.

– I samband med valet dukkar det gjerne opp historier om folk som har site i kommunestyre og hatt ulike verv i 40-50 år og eg håpar eg kan verta ein av dei. Eg har ingen ambisjonar om å sitja i Oslo. Det er det som skjer her lokalt som engasjerer meg mest og eg håpar eg framleis er aktiv i politikken om både 20 og 30 år, seier Bjarte Vatnøy.