– Ikkje gløym hunden

– Det er heilt forferdeleg. Det har site ein hund i bur her og bjeffa i alle fall i to timar. Fleire kundar har kome inn i butikken og spurt om me ikkje kan gjera noko, seier tilsette i ein butikk i Knarvik Senter.

Butikken er nær nabo til hundeparkeringa i senteret og dei som jobbar her vil gjerne koma med ei oppfordring til dyreeigarar.

– Ikkje la hunden sitja i hundeburet i lengre tid, seier dei.

Då Strilen var ved hundeparkeringa i 13-tida onsdag, sat det ein hund i bur og bjeffa når folk gjekk forbi.

I butikken er dei bekymra for velferda til hundane.

– Me er fleire naboar her som har snakka om dette. Ingen av oss kan forstå at hundeeigarar kan forlata eit dyr i ein slik boks i fleire timar. Bruken av hundebur som dette bør avgrensast til eit minimum. I dag er det heldigvis ikkje så varmt, men ein del hundar vert stressa av å sitja. Me veit ikkje om dei har tilgang til vatn, men uansett synest me ikkje at hundar bør verta sitjande på ein slik stad. Det er ikkje kjekt verken for hunden eller folk rundt, seier butikkpersonalet.

Onsdag ringte dei senterkontoret for å få hjelp.

– Me jobbar med å finna hundeeigaren. Eg trur det skal gå bra. Dersom me ikkje får kontakt, vil me opna buret og få hunden ut derifrå. Me finn nok ei løysing på det, får Strilen vita når avisa ringjer senterleiar Åge Torsvik.

Tilsette i butikkane gjev uttrykk for at det fleire gongar har vore problem med hundeparkeringa, men det kjenner ikkje senterleiaren til.

– Det går stort sett greitt. Det er svært sjeldan me har problem som dette, seier Torsvik.