– Knarvik nord vil dø ut

– Vert dette forslaget til ny kommunedelplan for Lindåsneset vedtatt, vil Knarvik nord og Hellestveit langsamt dø ut.
Etter eit bygdemøte tysdag føler talsmann Jostein Hellestveit at han har heile bygda med seg i å protestera kraftig mot forslaget som no er ute til høyring.
– Me vil seia klart ifrå på det opne møtet om planen på Lindås tysdag, seier Helles-tveit til Strilen.
Også grunneigarlaget i regionen er på bana og hadde møte i går kveld etter at Strilen gjekk i trykken.

– Klar stemning
– Om det er grunneigarar som ser at dei kan få ei inntekt ved sal, er det ei ærleg sak. Men for bygdene Knarvik nord og Hellestveit synest stemninga heilt klar mot det nye industriarealet, seier Hellestveit.
Det er den sørlege delen av planen, kring 1000 mål, dei nærmaste bygdene varslar kraftig motstand mot. Det er område E på kartet, ved Hellestveit og sørover forbi Knarvik, mot Risa og Lauvås.
Det utgjer om lag halvparten av planen. Forslaget seier dette skal vera framtidig areal for industri av regional og nasjonal interesse. Dei nye områda kan knytast mot den eksisterande industrien på Mongstad via ein tunnel gjennom åsen som skil områda.
– Det som kan koma, vert neppe noko søndagsskule-prega område for kontorbygg. Området er flatt og me ser ikkje for oss at storindustri i dette området vert til å leva med støymessig. Til dømes vert innmarka av Hellestveit-garden innestengt av industri på tre sider og riksvegen på den fjerde. Om det ikkje skjer i mi tid, vil det å opna for industri her, bety slutten for ei gardsdrift, seier Hellestveit.

Belasta frå før
Han viser til at bygda frå før er belasta med baseområdet på Mongstad sør stadig tettare innpå.
– I tillegg kjem belastning med stadig forureining av sjøområda, seier Hellestveit.
– Eit vedtak i kommunestyret frå 1983 seier dessutan at det skulle koma ei sone med planting mellom basen og Knarvik nord. Men denne sona er no utplanert, så me har tynnsliten tillit til at kommunen innfrir det som tidlegare har vore edle tankar, seier Hellestveit.
Han peikar òg på at planen informerer om at gjeldande reguleringsplan enno har 1800 mål ledig industriareal på Mongstad Nord og Sør.
 Blant anna har Statoil Mongstad kring 1000 ledige mål, og det er ledig areal på Mongstad Sør.
– Då bør ein vel heller oppmoda om at dette arealet vert nytta framfor å be innbyggjarar i nærmiljøet gje slepp på nye areal, seier Hellestveit.