17.maistemning for over/undergang

– Dette er ein stor dag for oss. Me har kjempa for dette i nesten 20 år, seier ei lukkeleg Irmelin Seljelid Larsen.

Tysdag vart det klart at fylkestinget løyver 15 millionar kroner til gang- og sykkelveg på Konglevoll.  Pengane skal både rekkja til ein overgang ved tunnelen på Konglevoll og ein undergang under vegen. Ny avkøyrsle til butikken skal og liggja inne i prosjektet.

Den tidlegare leiaren i Hundvin bygdelag fortel at så snart nyheita vart kjend, gjekk det meldingar rundt til folk i bygda.

Over tre år

Fylkestinget løyver fire millionar kroner neste år, ni millionar i 2012 og to millionar i 2013.

– Eg håpar dei begynner med overgangen ved tunnelen, for då kan dei som bur på vestsida av vegen, koma seg til skule, ungdoms- og bedehus utan å måtta kryssa riksvegen, seier Seljelid Larsen.

I dag har borna skuleskyss, men viss dei skal på aktivitetar på skulen eller andre stader utanom skuletid, må stort sett foreldra køyra fordi det er for farleg for borna å kryssa Fv57.

– Rett nok er fartgrensa no sett ned til 60 km/t, men mange respekterer ikkje den, seier Seljelid Larsen.

- Vår tur

– Mange vil kanskje seier at 15 millionar kroner er mykje til ei lita bygd som vår, men dette er kjempa for i lang tid. No er det vår tur, seier Janne Steinsund.

Ho er mor til to og har sjølv vakse opp i bygda.

– Eg har vore borti farlege episodar når eg skulle kryssa vegen, fortel ho.

Når trailerar dundrar forbi, vert det laga eit kraftig luftsug som kan vera farleg for gåande og syklande.

Også barnehagen

– Me er også veldig glade for overgangen som skal koma, seier Charlotte Nordahl Grimstad, som er styrar i barnehagen på Bruvoll.

– Når me får overgangen, kan me ta i bruk Dalheim til innandørs aktivitetar, seier ho.

Då vil dei og kunna koma seg til butikken.

Både born og vaksne hadde møta fram då Strilen skulle ta bilde i samband med saka.

– Du må få med at dette kan vera med på å sikra skulen og, vert det sagt.

Politikarane i Lindås har fleire gonger truga med å leggja ned Skodvin skule.