Allsidig innsats æra med pris

– Du har vore eit samfunnsengasjert menneske som har vore involvert i det meste, sa ordførar Hallvard S. Oppedal då han delte ut prisen under kommunestyret sin julemiddag på Eivindvik Fjordhotell.

Og lista vart lang då ordføraren skulle nemna alt som Dåe har vore involvert i.

Brekkestafetten

– Du har vore leiar og styremedlem i Brekke Idrettslag, og det var du som fekk i stand Brekke-stafetten og fekk ordna med grasmatte på fotballbana, sa Oppedal, som sjølv hadde vore med og lagt gras på bana då han var elev ved Brekke skule.

Både skirenn, hopprenn og friidrettsstemne hadde Dåe vore med på å arrangera.

Han har og vore både leiar og instruktør i Brekke Ungdomslag og medlem i Brekke Mannskor i over 35 år. Også i Sogn Songlag har han hatt verv. No er han leiar i Brekke pensjonistlag.

Bjarne Dåe er utdanna lærar, og han var i mange år skulesjef i Gulen.

Meiningar

Bjarne Dåe er og ein mann som er kjend for sine velformulerte meiningar og mange innlegg i avisene. Han har og gjeve ut to diktsamlingar og omsett fleire dikt og musikalar frå andre språk.

Og ikkje minst er Dåe kjend for arbeidet i Brekke sogenemnd og sogelaget. Han har og ført bygdeboka for Brekke i pennen.

– Du er eit ja-menneske som har vore ei stor drivkraft i mange samanhengar, sa ordføraren.

Takka

Bjarne Dåe takka for prisen. Han meinte det var mange eldsjeler rundt om som hadde gjort seg fortent til ein pris. Som ei motyting for prisen gav han eit hefte til alle i kommunestyret. Heftet er skrive av ein russar, og handlar om kontakten mellom Noreg og Russland i vikingtida.

Dåe deklamerte og utanboks heile Per Sivle sitt dikt «Tord Foleson» («Merket det standa») på vossemål.