Brassfest i Bergen

– Eg stod opp klokka seks i dag tidleg. Det kjem til å bli ein veldig lang dag, men det er kjempegøy å vera med på dette, seier Simone Kartveit.

Ho og Ingvild Aagaard-Nilsen har spelt i Oster Brass i omtrent eit år, og synest det var flott å gå på scena med korpset i NM for Brassband i Grieghallen.

– Eg trur me klarte oss ganske bra. Det er mange gode korps her. Målet vårt er å halda på plassen frå i fjor, seier dei til Strilen.

Oster var først ut av korpsa i 1. divisjon og spelte klokka ni laurdag morgon. Også musikantane i Bjørsvik Brass og Radøy Brass måtte tidleg opp for å gjera seg klare.

Konkurransen held fram utover dagen. Elitedivisjonen, der Eikanger-Bjørsvik og Manger musikklag er med, skal framføra sine sjølvvalde stykke i ettermiddag og premieutdelinga er som vanleg på festkonserten utpå kvelden.

I alt 76 korps deltek i NM for Brassband i år og Strilen følgjer sjølvsagt dei lokale korpsa.