Ellevill NM-jubel

– Det var svært nervepirrrande under premieutdelinga, melder Strilen sin journalist frå brass-NM i Grieghallen laurdag kveld.

EBML tok sigeren med 98 + 98 poeng for pliktnummer og sjølvvald, mot 94 + 97 for Manger Musikklag. Stavanger Brass tok tredjeplassen.

Eikanger-Bjørsvik sikra seg dessutan både solistprisen og gruppeprisen.

Harm Christian Tolden tok i mot pokalen for EMBL, og sjølv om korspet har vunne NM tre av dei siste fire åra, var jubelen like stor som tidlegare.

Ordførarane i Lindås og Radøy kommune sat på første rad då vinnaren vart annonsert, og Lindås-ordførar Astrid Aarhus Byrknes spratt opp av stolen og gav EMBL sin mann ein solid klem.

– Det er heilt fantastisk. Eg har spelt i korps sjølv i mange år og følgd dei lokale korpsa i helga. Nivået er utruleg høgt. Å få to korps frå Nordhordland på dei to øvste plassane er berre heilt fantastisk bra, strålte ho.

Også årets eldsjelpris gjekk til ein representant for korpsmiljøet i Nordhordland. Eirik Helland fekk prisen for framifrå innsats og engasjement gjennom mange år.

Vinnaren av 1. divisjon vart Tertnes Brass. Blant nordhordlandskorpsa i denne divisjonen vart plasseringa slik: Bjørsvik Brass på 3.plass, Oster Brass på 4. plass og Radøy Brass fekk 7. plass.

Askøy Brass stakk av med sigeren i 2. divisjon. I same divisjon kom Manger Old Star Brass på 5. plass og Lindås Brass hamna på 13 plass.

Strilen har vore følgd  dei lokale korpsa i helga og i avisa tysdag kan du lesa meir om kva som skjedde.