Fanga fisk på parkeringsplassen

– Me dreiv berre på og leika oss litt på isen her på parkeringsplassen, og då oppdaga med at det var ein fisk under isen, fortel dei to fjortenåringane til Strilen.
Dette skjedde i går ettermiddag om lag klokka halv tre. Gutane hadde fått litt tidleg fri frå skulen fordi dei hadde hatt tentamen. Då nytta dei høvet til å skeisa litt på skoa på isen som har lagt seg på restane av dammen som laga seg på parkeringsplassen i det kraftige regnet i førre veke.

Levande
Og fisken var levande.
– Då me knuste isen, begynte  han å sprella kraftig, fortel Sindre.
Det var ikkje vanskeleg å fanga fisken, for det var ikkje mykje vatn under isen. Det viste seg at fisken var ein fin liten aure på vel 20 centimeter. Gutane tok fisken opp, og då Strilen var på plass, gapte han berre litt med munnen.
– Det er berre rykningar, seier Sindre, som har budd i Gulen og har vore borti fiske før.
Når Strilen spør kva dei skal gjera med fisken, veit dei ikkje heilt.
– Kanskje eta han rå, smiler dei.
Sushi er jo in i tida.

Frå elva
Gutane veit ikkje heilt kor fisken kan ha kome frå, men den mest sannsynlege forklaringa er at fisken har sumt opp frå den vesle elva som går langs parkeringsplassen. Lokalkjende seier at det er fisk i den elva.
Då flaumen var på det største, gjekk elva og dammen på parkeringsplassen meir og mindre i eitt. Fisken har nok følgt litt dårleg med i timen då flaumen gjekk tilbake, slik at han vart fanga inne i den vesle dammen som låg att på parkeringsplassen.
Den vesle dammen ved Bikuben har vorte reine opplevingsparken i det siste. Førre veke kunne Strilen skriva om ei svane som la seg til i dammen i fleire dagar, og som fleire lesarar tipsa om.  Dammen ved Bikuben lagar seg kvar gong det er kraftig regnver. Det har vore snakk om at dreneringa skal betrast, slik at ein unngår at dammen dannar seg, men no vil kanskje butikken ha dammen som ein ekstra attraksjon?