Fann elghovud i papirbosset

– Eg hylte då eg såg det, seier driftsoperatør Bjørn Bergås.

Tysdag stod han og sorterte papiravfall på NGIR sitt anlegg i Kjevikdalen. Plutseleg kom det eit kadaver til syne i ein av posane. Det sette ein skikkeleg støkk i Bergås, som raskt fekk selskap av nyfikne kollegaer som lurte på kva dette kunne vera.

Kadaveret låg saman med papirbosset som kom til anlegget kvelden før. Og det var ikkje noko triveleg syn som møtte driftsoperatøren. Kadaveret såg ekkelt ut og det lukta stramt. Men då det første sjokket hadde lagt seg, gjekk praten livleg. Lunsjen vart heller ikkje forpurra etter møtet med kadaveret. Kollegaane diskuterte ivrig. Kva kunne dette vera?

Kanskje elg?

– Me var nok innom dei fleste dyretypar, men Rune Ones (driftsleiar red. anm) fastlso at det måtte vera ein elg, seier Ebba Fjelstad som også jobbar ved anlegget.

– For meg ser det ut som delar av eit elghovud, seier dritsleiar Ones.

Han driv sjølv med jakt og føler at han har rimeleg god kjennskap til dyr.

Driftsleiaren trur at dyret har lege i papiravfallet ei god stund, kanskje så lenge som to veker.

Utriveleg

Ones synest det er leit at denne typen avfall hamnar i papiravfallet og til sist hos dei.

– På anlegget driv me manuell sortering, det vil seie at me har tilsette som sorterer papir for hand. Det er svært kjedeleg for dei å bli utsett for ei slik utriveleg oppleving, meiner han.

I løpet av si tid ved anlegget har Ones opplevd å finna mykje forskjellig i papiravfallet.

– Me har blant anna funne hjort og andre rare ting, men aldri elg, seier Ones.

Dei har meld saka for politiet.

Ulovleg å jaka elg

Einar Vatne i Nordhordland lensmannsdistrikt seier til Strilen at han trur at elghovudet er restar etter nokon som har vore på elgjakt.

– Me har ikkje elg her og heller ikkje elgjakt. Funnet kan tyde på at har vore på elgjakt på Austlandet og at dyret har vorte frakta til Vestlandet. Det er vanleg å ta vare på geviret, seier han.

Politiet vil ikkje gjera noko meir med denne saka.